Қазақстан балуандары халықаралық жарыста ұятты жағдайға қалды. Көрші елде ел намысын қорғауға барған спортшылардың жағдайы жұрттың аяушылығын тудырды. Жарысқа барған балуандардың боз кілемге киіп шығатын арнайы формасы болмаған. Ал бапкер балуандарды жарысқа апару үшін банктен несие алған, деп хабарлайды Todayinfo.
Спорттағы бұл масқара жағдай қоғамда үлкен резонанс тудырды.
«Формасыз бардық. Тамыз айындағы әлем біріншілігіне дейін дайын болады деп жатыр. Бірақ Азия чемпионатына формасыз, әркімнің өзінде бар киіммен бардық. Былайша айтқанда, алапес болып жүрдік», – дейді Айдын Сәрсекеев.
Осы жағдайға байланысты тілшілер Олимпиадалық даярлау орталығының басшысы Жандос Үшкемпіровке хабарласқан. Алайда орталық басшысы бұл жағдайдан бейхабар екенін айтқан.
«Форма берілді емес пе? Сізге қайтадан хабарласамыз», – деп қысқа қайырған.
Кейін Олимпиадалық даярлау орталығы басшысының орынбасары Әділет Қүсманов бұл жағдайға қатысты түсініктеме берді:
«Күрес түрлерінен Бішкекте өткен Азия чемпионатына команда формасыз барды. Оның себебі жоқ емес. Бұған дейін түрлі жас деңгейіндегі командаларға форма тігуді бір ұйым қолға алуы тиіс еді. Бірақ бұл іс аяқсыз қалды да, форманы қайтадан өз қолымызға алдық. Азия чемпионатына дейін үлгермедік, енді тамызда өтетін әлем чемпионатына форма дайын болады. Вьетнамда өткен U17, U23 Азия біріншілігіне форма берілді. Басшымыз сол форма жайлы айтқан шығар.
Ал Айдын Сәрсекеевке келетін болсақ, онымен бұл жағдай келісілді. Біз спортшыларды қысқартуды сұрадық, ол өз орнын балуанға беріп, өз еркімен несие алды. Барлық спортшыны қаржыландыруға бюджет қаражаты жеткіліксіз», – деді Құсманов.
Осы жағдайдан кейін мақала кейіпкеріне жан-жақтан қоңырау түскені хабарланды.
«Себебі, бапкерлердің несие алып, жарысқа баруы әсте дұрыс емес. Сондай-ақ, балуандардың формасыз жүруі – Қазақстанның әлемдік деңгейдегі имиджіне сын!
Күрестен тағы да дау шықты. Бішкекте өткен 20 жасқа дейінгі спортшылар арасындағы Азия біріншілігінде Қазақстан құрамасы формасыз қатысты. Балуандар бір-бірінің формасын киіп, әркім өзінде бар киіммен шыққан.
Одан бөлек, грек-рим күресінен 20 жасқа дейінгі Қазақстан командасының бапкері Айдын Сәрсекеев жарысқа барып-қайту үшін 500 мың теңге көлемінде несие алған.
Бұл мәселеге Олимпиадалық даярлау орталығы тікелей жауапты», – деп жазды спорт журналисі Ақырыс Сейітқазы.
