Алматы қаласы әкімінің орынбасары Әсем Нүсіпова өз еркімен қызметінен кетті. Бұл туралы ақпаратты әкімдік баспасөз қызметі растады. Ол 2025 жылғы 7 тамызда қызметінен кеткен.
Қызметтік жолы
Әсем Нүсіпова 2022 жылдың ақпан айынан бері Алматы әкімінің орынбасары қызметін атқарып келді. Ол білім беру, денсаулық сақтау, жұмыспен қамту және халықты әлеуметтік қорғау салаларына жетекшілік етті.
Нүсіпова 1975 жылы 1 мамырда Алматы қаласында дүниеге келген. Әл-Фараби атындағы Қазақ ұлттық университетін тәмамдаған. Экономика және менеджмент мамандығы бойынша магистратура мен аспирантураны бітірген.
Еңбек жолын 1999 жылы әл-Фараби атындағы ҚазҰУ-да ассистент қызметінен бастаған. Кейін 2001 жылы ҚР Қауіпсіздік кеңесінің экономикалық қауіпсіздік мәселелері бөлімінің бас сарапшысы болып тағайындалған. 2002-2003 жылдары Президент әкімшілігінің жүйелі зерттеулер орталығында сектор меңгерушісі болды.
2003–2005 жылдары ҚР Қаржы министрінің кеңесшісі, Еуразиялық экономикалық қауымдастық хатшылығы жанындағы сарапшы топтың мүшесі, одан кейін Премьер-министр кеңесшісі және кеңесшілер тобының жетекшісі қызметтерін атқарды.
2006 жылы ҚР Премьер-министрі кеңсесінің жиынтық-талдау бөлімінің меңгерушісі,
2007–2008 жылдары ҚР Денсаулық сақтау вице-министрі болды.
2008–2016 жылдары «ҚазТрансОйл» АҚ-та экономика және қаржы жөніндегі бас директордың орынбасары қызметін атқарды.
2016–2019 жылдары Шығыс Қазақстан облысы әкімінің орынбасары,
2020 жылы ҚР Денсаулық сақтау министрлігінің жауапты хатшысы,
2020 жылдың қазанынан 2022 жылдың ақпанына дейін – Денсаулық сақтау вице-министрі болды.
Әкімдік құрылымындағы өзгерістер
Айта кетейік, Дархан Сатыбалды Алматы қаласының әкімі қызметіне кіріскеннен кейін, қала әкімдігінде бірнеше кадрлық ауыс-түйіс орын алды. Соңғы уақытта әкімдік жүйесінде жеті негізгі лауазым иелері ауыстырылған.
