Биыл Ұлы ақын, ағартушы, қоғам қайраткері Ғұмар Қараштың туғанына 150 жыл толып отыр. Осыған орай, Қадыр Мырза Әлі атындағы облыстық мәдениет және өнер орталығында облыстық, республикалық байқаулардың жеңімпазы, халықаралық байқаулардың лауреаты, әнші Райымбек Каримовтың «Ғұмардың елі – жыр әннің елі» атты ән кеші өтті.
Райымбек Каримовті облыста білмейтін жан кем де кем. Әуезді әндерімен, жағымды дауысымен халықтың жүрегінен орын алып, өнер айдынында бағы ашылған ақжолтай өнер иесі облыс орталығына келіп, қала тұрғындары мен қонақтарына мәнді де мазмұнды кеш сыйлады.
Кеште Райымбектің авторлық әндері, қазақ композиторларының танымал әндері шырқалды.
Концерттің шымылдығын «Сәлем, елім» әнімен ашып, өзін қолдай келген тыңдармандарымен амандасқан өнер иесі артын суытпай, ауылдан өздері көшкенмен, көңілдері көшпеген жерлестердің сағынышын «Ауылға сағыныш» әнімен басты.
Кеште әншінің тыңдармандарына сый жасалып, көптен күткен «Ғұмардың елі – жыр әннің елі» әні мен бейнебаянының тұсауы кесілді. Осы орайда Райымбек Асылбекұлы өнеріне қолдау білдіріп, демеушілік жасаған, әдемі бейнебаянның өмірге келуіне сеп болған аудан әкімдігі мен аудан басшысы Тимур Шиниязовқа зор алғысын айтты.
Әлемді тербеген аналардың ақ жаулығына оралған мамықтай жүректері бойтұмардай қадірлі екенін Абдул Рахметовтың сөзіне жазылған «Анаға сағыныш» әнімен жүректерге жеткізе орындаған әнші ұлдың шығармашылық кешіне әнші әрі композитор, «Мәдениет саласының үздігі», Қазақстан композиторлар одағының мүшесі Ербол Ақбасов, Қуаныш Қисметов сынды өнердегі ағалары қолдау білдіре келді. Сонымен бірге жастар арасында «Raketa» псевдонимімен кең танымалдыққа ие Рысбек Жанаисов та сахна төрінен табылып, көңілді хит әндерінен орындады.
Райымбек Каримовты патриоттық және ескінің есті әндерін шырқайтын аса дарынды дауыс иесі деп танитын жұртшылық үшін осы кеште әнші басқа қырынан да танылды. Ербол Қарағойшиннің «Сен маған лайықты емессің» әнінің тұсауы осы кеште кесіліп, тұңғыш орындаушысы кеш иесі Райымбек Асылбекұлы болды.
Сонымен бірге әнші алдыңғы буын тыңдармандарын да назардан қалдырмай, көпшілікпен бірге «Жайлау көл кештерін» орындап, көрерменмен рухани байланыс орнатты.
Мұндай әдемі кештердің бишілер мен сазды сүйемелдеушілерсіз көркі қызбас па еді. «Салтанат» би ансамблі мен «TASQYN BAND» вокалды-аспаптық ансамблі кешке әр кіргізіп, өнердегі әріптестерінен кәсіби қолдауларын аямады.
Сонау Ғұмар елінен, шығармашылық кеш иесімен бір сахнаны бөлісіп жүрген жерлес әріптестері, «Мәдениет саласының үздігі» Шынар Каюпова, Әсем Гайнуллина, Асылан Боранбаев арнайы келіп, төрттік «Жайықтың жағалаулары» әнін жүрекке жеткізе орындады.
Кешті әнші туған жеріне деген бар махаббатын сыйдырған, ауданның 100 жылдығына орай өткен «Әнімді саған арнадым – Жәнібек» атты әндер байқауында бас жүлдеге ие болған, «Жәнібегім – мекенім» (сөзі: Әділет Орынбасар, әні: Думан Бекқалиев) әнімен қорытындылады.
Әнші облыс көлеміндегі алғашқы шығармашылық кешін түйіндеп, концерттің жоғары деңгейде өтуіне себепкер болған кеш тізгінін ұстаған журналист әрі Қазақстан Жазушылар одағының мүшесі Әділет Орынбасаровқа, Ғ. Құрманғалиев атындағы Батыс Қазақстан облыстық филармониясының қызметкері Данияр Есқалиевке және барша тыңдармандары мен қолдау білдірген жандарға алғысын жеткізді.
Сонымен бірге әншіге жерлесіміз, қазақ музыка мәдениетінде аса көрнекті орын алатын күйші-композитор, Қадыр Мырза Әлі атындағы мәдениет және өнер орталығының директоры Дәулеткерей Құсайынов жылы лебізін арнап, облыстық басқарма төрағасының құттықтаухаты мен сыйлығын жеткізсе, Жәнібек аудандық мәслихат төрағасы Тахир Қадимов аудан басшысы Тимур Серікұлының алғысхатын табыстап, өнер иесіне шапан жапты.
Осылайша «Жәнібегім» деп жырлаған әнші ұлдың шығармашылық кеші жоғары деңгейде, тыңдармандарының есінде қаларлықтай өтті.
✍️Арай СЕЙФОЛЛА
«ШҰҒЫЛА»
