Қоғам қайраткері, «Демос» қоғамдық ұйымының жетекшісі Тұрарбек Құсайынов Бас прокурор Берік Асыловқа жүгініп, Қазақстан мұсылмандары діни басқармасының (ҚМДБ) кейбір уағыздары мен діни әдебиеттерінде христиандар мен иудейлерге қатысты кемсітуші және теріс көзқарас таратылып жатқанын мәлімдеді, деп хабарлайды Тodayinfo ақпараттық порталы.
Тұрарбек Құсайыновтың айтуынша, ҚМДБ-ның кейбір имамдары мен діни қайраткерлері қоғамдық уағыздарында христиандар мен иудейлер туралы жағымсыз пікірлер айтып, бұл жағдай діни төзімсіздік пен конфессияаралық шиеленіс тудырады.
Белсендінің мәлімдемесінде төмендегідей мәселелер атап өтілген:
Христиандар «адасқан қауым» ретінде сипатталады, бұл олардың өкілдеріне деген теріс көзқарас қалыптастырады.
Иудейлер «Құдайдың қаһарына ұшыраған халық» немесе «қарғыс атқандар» ретінде айтылады, бұл антисемитизмді өршітіп, діни алауыздыққа жол ашады.
«Әлеуметтік желілер мен видеохостинг платформаларында осындай сипаттағы көптеген аудио және видеоматериалдар бар. Бұл радикалды көзқарастардың таралуына ықпал етіп, қоғамдағы тұрақтылыққа қауіп төндіреді. Сондай-ақ елдегі 9 медресе мен «Нұр-Мүбарак» университетінде оқытылатын кейбір еңбектерде христиандар мен иудейлерге қатысты ескірген және кемсітуші түсініктер кездеседі», — деді Тұрарбек Құсайынов.
Қоғам қайраткері Бас прокуратурадан мына шараларды қабылдауды сұрады:
- ҚМДБ уағыздарында христиандар мен иудейлерге қатысты теріс пікірлерді алып тастау.
- Діни әдебиеттерді қайта қарау және христиандар мен иудейлерге қатысты кемсітуші мәлімдемелер бар кітаптарды таратуды тоқтату.
- Әлеуметтік желілер мен видеохостингтердегі материалдарды мониторингтен өткізіп, оларды бұғаттау.
- Медреселер мен «Нұр-Мүбарак» университетінде ортағасырлық түсініктерді дәріптейтін еңбектерді оқытуды тоқтату.
- Имамдардың уағыздарын бақылауды күшейтіп, олардың елдегі заңнамаға, діни төзімділік пен конфессияаралық келісім принциптеріне сай болуын қадағалау.
Тұрарбек Құсайынов өтінішінде христиандар мен иудейлерге қатысты теріс көзқарасты растайтын бірқатар аудио және видеоматериалдарға сілтеме жасағанын атап өтті.
«Бұл — ашық көздерден алынған дәлелдердің аз ғана бөлігі. Өтінішімді Қазақстан заңнамасына сәйкес қарап, конфессияаралық келісімді нығайтуға бағытталған тиісті шаралар қабылдауды сұраймын», — деп түйіндеді қоғам белсендісі.
