ҚМДБ басшысының кеңесшісі, бөлім басшысы Смайыл Сейітбеков Abay Live YouTube арнасына берген сұхбатында ислам дінінде дәулетті өмір сүруге тыйым салынбайтынын, керісінше, мұсылманға материалдық жағдайын түзеп, парыздарды орындау маңызды екенін айтты, деп хабарлайды Тodayinfo ақпараттық порталы.
Сұхбат барысында дін маманы исламның бес парызына тоқталды.
«Исламның бес парызы бар: иман келтіру, намаз оқу, ораза ұстау, зекет беру, қажылыққа бару. Соңғы екі парызды орындай алу үшін дүние-мүлік қажет. Алла тағала мұсылманға кедей болуды бұйырған жоқ. Егер кедей болу парыз болғанда, қажылықты да парыз етпес еді. Пайғамбар заманындағы сахабалардың көпшілігі кәсіпкер әрі дәулетті жігіттер болған. Олар пайғамбарымыздың ең сенімді серіктері еді»,– деді ол.
Дінтанушының айтуынша, дін қызметкерлерінің әлеуметтік жағдайын да ескеру маңызды.
«Орта ғасырларда дін адамдарына арнайы жалақы бөлінетін. Қазақ даласында байлар мешіт пен медресе салып, молдаларға қолдау көрсеткен. Имамдар Алла разылығы үшін қызмет етеді, бірақ олардың да баспана мәселесі мен күнделікті қажеттіліктері шешілуі тиіс», – деп түсіндірді ол.
