Зейнетақы: Қазақстандықтар енді "сұлулық үшін" ақша шеше алмайды
Бүгін, 12 желтоқсанда, қазақстандықтар үшін зейнетақы жинағының артық бөлігін пайдалану ережелеріне өзгеріс енгізілді. Енді enpf-otbasy.kz платформасы арқылы пластикалық операцияларға өтінім беру мүмкіндігі ресми түрде тоқтатылды. Бұл туралы "Отбасы банк" АҚ баспасөз қызметі шұғыл хабарлады.
Халық неге жаппай "сұлулануға" көшті?
Банктің мұндай қадамға баруына негізгі себеп – сұраныстың күрт, тіпті "аномальді" түрде өсуі болды. Естеріңізде болса, бұған дейін тіс емдеу мен офтальмология қызметтеріне зейнетақы қаржысын жұмсауға тыйым салынған еді. Осы шектеуден кейін халықтың басым бөлігі бірден пластикалық хирургияға бет бұрған.
Статистикаға сүйенсек, өсім таңқаларлық:
-
Бұрын айына орта есеппен небәрі 16 өтінім түсетін;
-
Қыркүйекте бұл көрсеткіш 123-ке жетті;
-
Қазан айында 1 844-ке бір-ақ секірді;
-
Қарашада 3 878 өтінім қабылданған.
Ал желтоқсан айының алғашқы 8 күнінде ғана (стоматология жабылғаннан кейін) пластикалық операцияға 2 093 өтінім түскен. Бұл орташа айлық көрсеткіштен 130 есе көп! Желтоқсан айында сұралған жалпы соманың өзі 1,8 миллиард теңгені құрап отыр.
Өтінім беріп үлгергендер не істейді?
Егер сіз өтінім беріп қойған болсаңыз, уайымдаудың қажеті жоқ. Банк өкілдері қазіргі уақытта қаралып жатқан 6 294 өтінімнің барлығы заңды тәртіппен толық өңделетінін жеткізді. Яғни, үлгергендер ақшасын ала алады.
Енді ақшаны қайда жұмсауға болады?
Пластикалық отаға тыйым салынғанымен, зейнетақы жинағын денсаулыққа пайдаланудың маңызды жолдары әлі де ашық. Қаражатты төмендегідей күрделі әрі қымбат ем түрлеріне бағыттай аласыз:
-
Орфандық (сирек кездесетін) ауруларды емдеу;
-
Радионуклидтік және радиойодты терапия;
-
Радиохирургиялық емдеу (Гамма-пышақ, Кибер-пышақ);
-
Протонды терапия.
Сонымен қатар, ең танымал бағыт – тұрғын үй жағдайын жақсарту мүмкіндігі өзгеріссіз қалды. Сіз жинақты ипотеканы толық немесе жартылай жабуға, үй сатып алуға немесе болашақта баспана алу үшін "Отбасы банктегі" депозитіңізді толықтыруға жұмсай аласыз.
