«Жетісудың 7 кереметі»: Туризмді дамытуға бағытталған жаңа жоба басталды

Жетісу облысы – табиғаты және тарихи көрнекті орындары жағынан ерекше туристік тартымды аймақ. Өңірде өлкенің туристік әлеуетін көпшілікке кеңірек таныту мақсатында «Жетісудың 7 кереметі» жобасы қолға алынды. Соның аясында жобаға таңдалып алынған жеті нысанның ерекшелігі мен сипатын ашатын бейнероликтер түсіріліп ұсыныла бастады, деп хабарлайды Todayinfo ақпараттық агенттігі Жетісу облысы әкімінің баспасөз қызметіне сілтеме жасап. Атап айтқанда, «Visit Zhetysu» туристік ақпараттық орталығы тарапынан іске асырылып отырған жобаның алғашқы бейнеролигі «Алтынемел» мемлекеттік ұлтық табиғи паркіне арналады. Соның ішінде «Алтынемел» паркінің табиғи ландшафтары, археологиялық ескерткіштер мен сирек кездесетін флорасы мен фаунасы, биіктігі 150 метрді құрайтын үлкен құмды төбе – музыкаға ұқсас дыбыстар шығаратын қасиетімен танымал «Айғайқұм», Ақтау және Қатутау таулары, оған қоса ұзақ жыл тіршілік етудің көрнекті белгісіне айналған 700 жылдық Ива ағашының да ерекшелігі таныстырылады. Іле өзенінің оң жағалауында орналасқан «Бесшатыр сақ қорғандары» сақ-тиграхауд билеушілері қорғандарының археологиялық кешені де бейнероликте кеңінен насихатталады. Атап өтсек, «Жетісудың 7 кереметі жобасы» аясында басқа да нысандар бойынша әзірленген танымдық бейнероликтер көпшілікке апта сайын ұсынылады деп жоспарланған. Жалпы жоба өлкеге туристерді көптеп тартуға ықпал етуді, сол сияқты аймақтағы табиғи-тарихи орындар туралы халықтың танымдық білімін кеңейтуді мақсат етіп отыр.