Өскемен қаласындағы Жеңіс көшесі, 10 мекенжайында орналасқан «Magnum» супермаркеті «Время истекло» атты азаматтық бастама аясында тексеруден өтіп, сөрелерден жарамдылық мерзімі әлдеқашан өткен тауарлардың жаппай сатылып жатқаны әшкереленді. Белсенділер бірнеше арба толы бұзылған өнімдерді тауып, кейбір тауарлардың мерзімі бір жылдан да бұрын өтіп кеткенін анықтады. Анықталған заңбұзушылықтар тіркеліп, дүкен әкімшілігіне ресми ескерту жасалды. Басшылық кемшіліктерді жоюға уәде берген.
Алайда арада бір ай өтсе де, жағдай өзгермеді. Қайта тексеріс барысында сөрелерде мерзімі өткен тауарлар тағы да табылып, олардың түрі тіпті көбейгені белгілі болды. Бұл жолы ет өнімдері мен қышқыл-сүт тағамдары да тізімге енген.
Жаңа адамдар қозғалысының өкілдері дүкеннің әрекетіне ашық наразылық білдіру үшін ерекше акция ұйымдастырды: олар үш бөшкеге мерзімі өткен тауарларды толтырып, «Magnum мерзімі өткен өнімдерді сатады», «Бұл қоқыс — сіздерге сатылмақ болған тауар» деген жазуы бар газельге тиеп, қала көшелерін аралап шықты. Кейін химқорғау костюмдерін киіп, «УЛЫ ЗАТ» деп белгіленген бөшкелерді супермаркетке қайта әкеліп, тауарды ресми түрде кері қайтарды.
Демонстративті акция кезінде дүкен желісіне жауапты директор да оқиға орнына келіп, сөрелерде шынымен де жарамдылық мерзімі өтіп кеткен тауарлардың көп екенін мойындады. Ол белсенділермен бірге өнімдерді утилизациялау жұмысына қатысып, мұндай жағдайдың енді қайталанбайтынын айтты.
Аманбаева Амина, «Жаңа адамдар» қозғалысының өкілі:
«Мерзімі өткен тауар — мерзімі өткен сана. Бұл тек тамақ туралы мәселе емес, адамдардың уақытқа, іске деген көзқарасы туралы. Егер дүкенге барғанда жарамдылық мерзімі өткен өнімді көрсеніздер — суретке түсіріп, бізге жіберіңіздер. Бұл — үлкен өзгерістерге апарар қарапайым қадам. „Время истекло“ тек тауарларға қарсы күрес емес, бұл — ескірген санаға қарсы күрес. Өзгеріс әрқайсымыздан басталады».
