Петропавл қаласының кіре берісіндегі «Welcome to Petropavlovsk» жазуының орнына енді «Солтүстікке қош келдіңіздер» деген қазақша жазу орнатылып жатыр. Бұл жаңалық жергілікті тұрғындардың ерекше қуанышына себеп болды, деп хабарлайды Тodayinfo ақпараттық порталы.
Әлеуметтік желіде осы өзгеріс туралы жазған Бурахан Даханов болды.
«Бұрын бұл жерде «Welcome to Petropavlovsk» деп жазылып тұратын. Енді міне, қазақша жазуға ауыстырып жатыр екен. Петропавлдың Қызылжарға айналуы да жақын сияқты», — деп бөлісті ол.
Оның пікірінше, бұл өзгерістер өңірдің тарихи атауларын қайтару жолындағы маңызды қадам.
Авторлар Қызылжар қаласының атауы ресми түрде бекітіліп, тіпті облыс атауы да «Солтүстік Қазақстан» емес, «Қызылжар облысы» болып өзгерсе деген үміттерін білдіруде.
«Егер осы Қызылжарға 1000 қазақ отбасы көшіп келсе, өңірдің ұлттық рухы күшейе түсер еді», — дейді жазба авторы.
Бұл бастама тұрғындар арасында үлкен қолдау тауып, болашақта өңірдің қазақы келбетін одан әрі арттыруға серпін беруі мүмкін.
