Мәжіліс депутаты Асхат Аймағамбетов психикалық ауытқулары бар азаматтарға қатысты мәселеге кешенді тәсіл қажет екенін мәлімдеді. Қоғам бұл оқиғадан дұрыс қорытынды жасап, тек қылмыстық қудалау емес, жүйелі шешімдерді қолға алу керек, деп хабарлайды Тodayinfo ақпараттық порталы.
«Қазір қылмыстық іс қозғалды, мемлекеттік органдар мен үкімет тиісті шаралар қабылдайды деп сенемін. Бірақ бұл мәселені жеке оқиға арқылы ғана шешу мүмкін емес, себебі ол жүйелі сипатқа ие», — деді Аймағамбетов Мәжіліс кулуарында.
Депутат дамуында және психикалық денсаулығында ауытқулары бар балалардың саны жыл сайын артып келе жатқанын атап өтті.
«Мәселе тек анықтау мен бақылауда ғана емес, сондай-ақ жүйелі қолдау көрсетуде», — деді ол.
Аймағамбетовтың пікірінше, психикалық ауытқулармен күрес кешенді шараларды талап етеді.
«Психикалық денсаулығы әлсіз азаматтарды қоғамнан оқшаулау мәселені шешпейді. Біз қолдау көрсетудің тиімді механизмдерін әзірлеуіміз керек», — деп қорытындылады депутат.
