Фото: instaturbo.ru
Қазақстандық блогерлерге жалпы сомасы 53,3 миллиард теңгені құрайтын салықтық міндеттемелер жүктелді. Мемлекеттік кірістер комитетінің мәліметінше, 594 адамның табыс декларацияларында айтарлықтай сәйкессіздіктер анықталған, деп хабарлайды Тodayinfo ақпараттық порталы.
Комитеттің хабарлауынша, мемлекеттік кірістер органдары бақылау шараларын жүргізу барысында уәкілетті мемлекеттік органдармен, ұйымдармен және басқа да тұлғалармен бірлесе әрекет еткен. Түрлі дереккөздерден алынған мәліметтерді салық декларацияларымен салыстыру нәтижесінде 594 блогердің кірістерін төмендеткені белгілі болды.
«2024 жылғы 13-14 ақпан аралығында осы тұлғаларға «кірісті төмендету» фактісі бойынша камералдық бақылау шеңберінде салықтық хабарламалар жіберілді. Бұл хабарламаларды орындау үшін қосымша салықтық есептілікті тапсыру және өз бетінше есептелген салықтарды төлеу қажет. Егер блогерлер бұл шешіммен келіспесе, 30 жұмыс күні ішінде түсіндірме ұсынуы тиіс», – делінген ведомство хабарламасында.
Сонымен қатар, Мемлекеттік кірістер комитеті кез келген кіріс, соның ішінде интернет-жарнама, ақпараттық өнімдерді сату, онлайн курстар өткізу және түрлі ұтыстар ұйымдастыру сияқты қызметтерден түскен табыстардан салық төлеу қажеттігін ескертті. Бұл талаптар Қазақстан Конституциясы мен Салық кодексіне сәйкес реттеледі.
