Белгілі тележүргізуші Дина Төлепберген 15 жылдан кейін күйеуімен бірге түскен суретін жариялап, отбасылық қарым-қатынас және ер-азаматтың әйелге деген құрметі туралы ой толғады.
Бұл туралы Todayinfo ақпарат агенттігі хабарлайды.
«Әйелге құрмет – мәңгілік тақырып»
Дина Төлепберген өз жазбасында ер мен әйел арасындағы қарым-қатынастың маңыздылығына, сондай-ақ, қоғамдағы кейбір қалыптасқан көзқарастарға тоқталды.
«Ол саған есік ашып жүр ме, сонда?» деген әріптестерінің 2010 жылы айтқан сөздері әлі күнге дейін есінде екенін жеткізді. Ол кезде болашақ жұбайы жұмыс орнына келіп, көлік есігін ашып тұрғанын көрген әріптестері мұны әзілге айналдырған.
«Қазір 2025 жыл, 15 жыл өте шықты, бірақ ештеңе өзгермеген. Әйелге есік ашу, пальтосын киюге көмектесу, жаңбырда қолшатыр ұстау, шотты төлеу – осылар әлі күнге дейін талқыланып келеді. Ең қызығы, еркектің қарапайым құрметін кей «данышпандар» мазаққа айналдырады», – дейді ол.
«Өзін ақтау үшін ер адам өзгеден кінә іздейді»
Журналистің пікірінше, кейбір ер-азаматтар өзінің қателіктерін мойындаудың орнына, айналасындағыларды кінәлауға бейім келеді.
«Ақылды біреу айтқан екен: адам – табиғатынан жақсы. Егер ол жамандық жасаса, жүрек түкпірінде бәрібір бір жері ауырып тұрады. Бірақ ұятын жеңу үшін, өз кінәсін ақтау мақсатында өзгеден мін іздей бастайды» – деп жазды ол.
Мәселен, ер адам опасыздық жасаған кезде, өзін ақтау үшін түрлі сылтаулар ойлап табады:
- «Маған көңіл бөлмейді»
- «Өзін күтпей кеткен»
- «Толып кетті»
- «Қанша ақша берсең де, жетпейді»
Осындай қателіктерін басқаның мойнына артып, өз кінәсін ақтауға тырысуы жиі кездесетін жағдай екенін атап өтті.
«Бір түндік романдар мен «пәк қыз» тақырыбы»
Тележүргізуші екіұдай стандарттарға да назар аударды. Оның айтуынша, кейбір жігіттер «бір түндік романдарға» әуес болып, соған қарамастан, тек «пәк қызға» үйленгісі келеді.
«Иә, «Еркектік логика» деген өте қызық ғылым екен» – деп түйіндеді ол.
Дина Төлепберген кім?
Дина Төлепберген – Қазақстанның танымал тележүргізушісі, журналист, қоғам белсендісі. Ол өзекті әлеуметтік тақырыптарға батыл пікір білдіруімен, сондай-ақ әйелдер құқығы, отбасы құндылықтары және қоғамдағы гендерлік мәселелер туралы ашық айтуымен танымал.
Оның бұл жазбасы да әлеуметтік желіде қызу талқыланып, көптеген оқырмандар қолдау білдірді.
