Фото: Мәжіліс
Мәжіліс төрағасы Ерлан Қошанов Қазақстандағы суперпрезиденттік басқару дәуірінің аяқталғанын мәлімдеді. Оның айтуынша, елде билік тармақтары арасындағы тепе-теңдікті сақтайтын жаңа саяси жүйе қалыптасты, деп хабарлайды Todayinfo.
«Елу жылда ел жаңа, жүз жылда – қазан» дейді дана халқымыз. Басқаша айтсақ, ондаған жылдар бойы нәтижесін беріп келген жүйе өз жұмысын тоқтатады деген сөз. Отыз жыл бойы Қазақстанда суперпрезиденттік басқару формасы қолданылды. Алайда, уақыт өте келе, ұзақ жылдар бойы жұмыс істеген модель үлкен саяси дағдарысқа алып келді. Бұған негізінен мемлекетімізге бір ғана адам үстемдік етіп, елдің бар байлығын санаулы адам иеленуі себеп болды. Бұл жайт қоғамның ашу-ызасын туғызды және елдің дамуын тежеді», – деді Ерлан Қошанов.
Ерлан Қошановтың сөзінше, үш жыл бұрын Қазақстанда саяси жүйені жаңғырту процесі басталды. Елде барлық биліктің бір қолда шоғырлануына мүмкіндік беретін жүйеден бас тарту қажет болды.
«Әлемде болып жатқан жағдайлар көптеген елде жоғарғы билікті басқа саяси институттарға беру және табыстау әлі күнге дейін түрлі дау мен пікірталасқа ұласатынын көрсетіп отыр. Біздің елімізде Президент, керісінше, өзінің жеке бастамасы бойынша өкілеттіктердің бір бөлігін қайта бөліп, бір реттік жеті жылдық мерзімді енгізді. Осылайша, суперпрезиденттік басқару моделінің дәуірі аяқталды»– деді Мәжіліс төрағасы.
Оның айтуынша, елде бұрынғы саяси құрылым толығымен өзгеріп, билік тепе-теңдігі қалыптасты.
«Президенттің жанында жаңартылған, қажетті өкілеттіктері бар және қоғамның сеніміне ие болған Парламент, Үкімет, Конституциялық Сот және саяси партиялар пайда болды. Әр іс-әрекеттен заң мен тәртіпке деген құрмет көрініп тұратын әлеуметтік мемлекеттің айшықты бейнесі айқындалып келеді. Осы сәттен бастап Әділетті Қазақстан жай ғана ұран емес, нақты мүмкіндікке айналды», – деп түйіндеді Ерлан Қошанов.
