Фото: ortcom.kz
Қосымша құн салығының (ҚҚС) мөлшерлемесін көтеру инфляцияның қосымша 3%-ға өсуіне әкелуі мүмкін. Алайда бұл әсер қысқа мерзімді болады және бір жыл ішінде тұрақталады. Бұл туралы вице-премьер – Ұлттық экономика министрі Серік Жұманғарин Үкімет отырысында мәлімдеді, деп хабарлайды Тodayinfo ақпараттық порталы.
Министрдің айтуынша, салық мөлшерлемесінің өсуі инфляцияға уақытша ғана ықпал етеді. Әлемдік тәжірибеге сүйене отырып, Жұманғарин ҚҚС өскеннен кейін орталық банктердің әдетте пайыздық мөлшерлемелерді төмендететінін, бұл өз кезегінде экономикалық тұрақтылыққа қол жеткізуге көмектесетінін атап өтті.
«Салықты көтерудің ықтимал инфляциялық әсері бір жыл ішінде аяқталады. Қосымша инфляция 3% деңгейінде күтілуде», — деді Жұманғарин.
ҚҚС мөлшерлемесін көтеру мемлекеттік бюджетке жыл сайын 4-5 трлн теңге қосымша түсім әкеледі деп болжанып отыр. Министрдің айтуынша, бұл қаражат Ұлттық қорға тәуелділікті азайтуға, мемлекеттік қарыз деңгейін төмендетуге және экономиканың маңызды секторларын дамытуға бағытталатын болады.
«Салық түсімдерінің өсуі инфрақұрылымды, агроөнеркәсіптік кешенді, өңдеу өнеркәсібін және қорғаныс саласын дамытуға қосымша ресурстар береді», — деп түсіндірді Жұманғарин.
Серік Жұманғарин Үкіметтің өңірлердегі бизнес-қауымдастықтармен байланыс орнатуға дайын екенін айтты. Алты жұмыс тобы құрылып, аймақтарда Үкіметтің салықтық бастамаларын талқылау басталған.
«Барлық ұсынысты тыңдауға және ашық диалог жүргізуге дайынбыз», — деп сендірді министр.
