Фото: parlam.kz
Мәжіліс депутаты банк қызметкерлері мен жергілікті органдардың алаяқтармен сыбайлас екенін сынады, деп хабарлайды Тodayinfo ақпараттық порталы.
Мәжіліс депутаты, AMANAT фракциясының мүшесі Ринат Зайытов кибералаяқтықпен байланысты жағдайларға қатысты алаңдаушылығын білдіріп, банктер мен жергілікті органдардың жауапкершілігін қатаң сынға алды. Ол алаяқтық әрекеттерге банк қызметкерлерінің де қатысы бар екенін атап өтті.
Зайытов алаяқтық әрекеттердің құрбанына айналған азаматтардың мәселесіне назар аударып, бұл мәселеде тиісті органдардың еш шара қолданбай отырғанын жеткізді.
«Кибералаяқтар халықтың шотындағы ақшасын ұрлап, тіпті сырттай несие рәсімдеуге дейін барған. Бұған қарамастан, үкімет пен банктер зардап шеккен азаматтарға көмектесудің орнына, олардың есепшоттарын бұғаттап, жауапкершіліктен жалтарып отыр», – деді депутат.
15 қылмыстық іс қозғалған
Ринат Зайытовтың айтуынша, көптеген алаяқтық әрекеттер банк қызметкерлерінің қатысуымен жүзеге асқан. Мысалы, Қарағанды қаласында жұмыспен қамту және әлеуметтік қорғау басқармасының қызметкері 90 зейнеткер мен мүгедектігі бар азаматтың ақшасын жымқырған. Сондай-ақ Талдықорған, Астана және Алматы қалаларында банк қызметкерлерінің азаматтардың жеке мәліметтеріне қол жеткізуге көмектескені дәлелденген.
«2025 жылдың қаңтар-ақпан айларының өзінде ҚР Қылмыстық кодексінің 250-бабы (Өкілеттіктерді теріс пайдалану) бойынша – 15, ал 254-бабы (Міндеттеріне адал қарамау) бойынша – 17 қылмыстық іс қозғалды», – деді Зайытов.
«Алаяқтарға тосқауыл қою – банктердің міндеті»
Депутаттың айтуынша, банктер азаматтардың шоттарының қауіпсіздігін қамтамасыз етуде өз міндеттерін орындамай отыр. Алаяқтардың әрекеттерінен зардап шеккендердің қаржысын қайтару мәселесі әлі де шешімін таппаған.
«Ата заңымызда мемлекеттің басты байлығы – халық деп жазылған. Алаяқтардың құрбаны болған азаматтардың шоттарындағы қаржысын қайтаруды банктер өз мойнына алуы керек», – деді Ринат Зайытов.
Ұсыныстар: Банктердің жауапкершілігі артсын
Ринат Зайытов Бас прокурор Берік Ноғайұлына жолдаған сауалында бірқатар ұсыныс білдірді:
- Кибералаяқтықтың құрбаны болған азаматтардың шоттарын бұғаттауға тыйым салу;
- Алаяқтық әрекеттерден зардап шеккендердің шығынын банктер өтеп беруін міндеттеу;
- Шоттардағы қаржының сақталуына банктердің толық жауапты болуы.
