Сейсмикалық қауіпті аймақтарда құрылыс жұмыстарын жүргізу туралы заңнамаға жаңа талаптар енгізіліп жатыр. Бұл туралы Премьер-Министр Олжас Бектенов мәлім етті.
«Арнайы қорғауға алынған аймақтар мен сейсмикалық қауіпті аудандарда тұрғын үй салу мәселесіне жеке тоқталғым келеді. Бұл мәселе әсіресе Алматы қаласында өзекті. Былтыр онда 150-ден астам құрылыс нормасын бұзу фактілері анықталды. Атап айтқанда, таулы жерлерде, су объектілерінің бойында және ерекше қорғалатын аумақтарда құрылыс салынған. Жаңа құрылыс жұмыстарына қатысты әсіресе сейсмикалық аймақтарда бақылауды күшейту мәселесі бірнеше рет талқыланды», — деді Олжас Бектенов Үкімет отырысында.
Үкімет басшысы тиісті талаптар заңнамаға енгізіліп жатқанын айта келе, оны қатаң сақтау керектігін тілге тиек етті.
