Алматы облысы Талғар қаласының тұрғындары қаланың жолдарын өздері жөндеп жатыр.
Әлеуметтік желіде жергілікті тұрғындардың қаланың орталық көшелерінің бірінде шұңқырларды жауып жатқанын көрсететін видео тарады.
Постта олардың өз қаражатына жөндеу жұмысын жүргізіп жатқаны айтылған.
«Талғар ауданына жыл сайын жол жөндеуге бюджеттен мол қаржы бөлінеді… халық нашар жолдармен жүріп, тіпті өз қаражатына оларды жөндейді» делінеді постта.
Талғар аудандық жолаушылар көлігі және автомобиль жолдары бөлімі тұрғындар су құбырын өздері жүргізіп, кейін көшені өз қаражатына жөндегенін хабарлады.
«Өз тарапымыздан Талғар қаласы көшелерінде жөндеу жұмысын жүргізуге жобалық-сметалық құжаттама дайын екенін хабарлаймыз. Бірақ оның көпшілігінде Талғар қаласының сумен жабдықтау жүйесін реконструкциялау және салу жобасы (1,2,3,4-кезеңдер) бойынша су құбырын ауыстыру күтіліп отыр. Жұмыс қаржы бөлінген соң басталады» деп хабарлады Талғар аудандық әкімдігі.
