Түркістан облысына ҚР Энергетика вице-министрі Құдайберген Арымбек жұмыс сапарымен келіп, тауарлық газ бағасын қалыптастыру сұрағына байланысты өңір жұртшылығымен кездесу өткізді, деп хабарлайды Todayinfo ақпараттық агенттігі.
Кездесуде ҚР Энергетика вице-министрі Құдайберген Арымбек тауарлық газ бағасының қалай қалыптасатыны жайында халықты құлақтандырды. Ол жиын барысында тауарлық газ бағасының өзгеруіне әсер ететін негізгі факторлар туралы кеңінен түсініктеме берді.
— Құрметті жиынға қатысушылар! Жұртшылыққа, бизнес өкілдеріне, мәслихат депутаттарына және басқа да мүдделі органдарға түсіндіру жұмыстарын жүргізу мақсатында Энергетика министрлігі, Ұлттық экономика министрлігінің Табиғи монополияларды реттеу комитеті, «QazaqGaz” ҰК» АҚ басшылығы және басқа да мүдделі органдардың қатысуымен жұмысшы топ құрылды. Бүгін осы жұмысшы топпен Түркістан өңіріне келіп отырмыз.
Газ бағасының өзгеріп тұруына бірнеше маңызды факторлар әсер етеді. Біріншіден, елімізде газдандыру қарқынды жүруде. Қазіргі таңда Қазақстан халқының 62%-ы көгілдір отынмен қамтамасыз етілген. Дегенмен, тауарлық газды тұтыну — оны өндіру көлемінен едәуір асып түсіп отыр. Бұл жағдай «QazaqGaz» ұлттық компаниясын газды өзіндік құнынан төмен бағамен сатуға мәжбүр етеді.
Қазіргі қолданыстағы бағалармен газды сатып алу, тасымалдау және республика аумағында тарату шығындарын толықтай жабу мүмкін болмай тұр. Газ бағасының тиімді деңгейін қалыптастыру — газ инфрақұрылымын дамыту мен модернизациялауға қаражат бөлуге мүмкіндік береді. Бұл, өз кезегінде, жеткізілімнің тұрақтылығын арттырып, өңірлердің газдандыру процесін жеделдетуге жәрдемдеседі. Сонымен қатар геологиялық барлау, көмірсутектерді қайта өңдеу сияқты салаларға инвестициялар тартуға жағдай жасайды. Мұның бәрі газ саласының ұзақ мерзімді тұрақтылығын қамтамасыз етуге бағытталған, — деп атап өтті вице-министр.
Кездесу барысында жергілікті тұрғындар өздерін толғандырған сұрақтарын қойып, нақты жауаптар алды. Тұрғындар көтерген мәселелердің арасында газ бағасын тұрақтандыру, газдандыруды одан әрі дамыту, сондай-ақ инфрақұрылымдық жобаларды қолдау сұрақтары қарастырылды.
Сапар аясында вице-министр жергілікті кәсіпкерлермен және мәслихат депутаттарымен де кездесу өткізіп, газ саласын дамытудың перспективалары жайлы пікір алмасты.
Түркістан облысы әкімінің баспасөз қызметі мәлімдегендей, мұндай кездесулердің басты мақсаты – қоғамның пікірін ескере отырып, ашықтық пен айқындылықты қамтамасыз ету.
