Сыртқы істер министрінің бірінші орынбасары Ақан Рахметуллин Түркияда болып жатқан наразылықтар кезінде қазақстандық туристердің қауіпсіздігін сақтау маңызды екенін айтты, деп хабарлайды Todayinfo.
Рахметуллиннің айтуынша, Қазақстанның Анкара мен Измирдегі елшіліктері шұғыл әрекет етіп, Түркиядағы отандастарымызға қауіпсіздік шараларын сақтау туралы ақпарат берген.
«Қазір Түркияда қанша қазақстандық азамат бар екенін нақты айту қиын. Олар туристер, студенттер және консулдық есепте тұрған азаматтар болып үш санатқа бөлінеді. Дегенмен, наразылықтар кезінде зардап шеккендер тіркелген жоқ», – деді ол.
Рахметуллин қазіргі жағдайды ескере отырып, қазақстандық туристерге Ыстамбұлға сапарды кейінге қалдыруды ұсынды.
«Ресми түрде бармаңыздар деп айта алмаймыз. Бірақ жеке пікірім ретінде қазір Түркияға баруды тоқтата тұрар едім. Әсіресе Ыстамбұлға баруға кеңес бермеймін. Дегенмен, сол жақтағы отандастарымыздың елден кету туралы өтініш білдіргендері жоқ», – деді СІМ өкілі.
Еске сала кетейік, Ыстамбұл қаласының мэрі, оппозициялық саясаткер Экрем Имамоглудың қамауға алынуына наразылық білдірген халық жаппай қарсылық акцияларын ұйымдастырып жатыр.
