фото: Azattyq Ruhy
Әлеуметтік желілерде Астана қаласының бас имамының зәулім үйі және төрт әйелі бар деген ақпарат тарады. Алайда Елорда имамы Ерболат Жүсіпов бұл мәліметті жоққа шығарып, жалған ақпарат екенін мәлімдеді, деп хабарлайды Тodayinfo ақпараттық порталы.
Имамның жауабы
Фейсбук пен TikTok-та белгісіз бір азамат жалған аккаунт арқылы «Бұл Астана бас имамының үйі» деген мазмұндағы видео жариялаған.
Осыған байланысты Ерболат Жүсіпов ресми мәлімдеме жасап, жалған ақпараттың дін қызметкерлеріне қарсы бағытталған әрекет екенін атап өтті:
«Құрметті мұсылман жамағаты! Қазір әлеуметтік желілерде Ислам дініне және дін қызметкерлеріне күйе жағу үрдісі белең алды. Ондай адамдар шектен шықты деп айтуға болады. Алла оларға хидаят берсін. Желідегі бұл видео мүлдем шындыққа жанаспайтын ақпарат екенін қаперлеріңізге саламын», – деп жазды имам.
Жалған ақпараттың таралуы алаңдаушылық тудырады
Имам Ерболат Жүсіпов халықты әлеуметтік желілердегі жалған ақпаратқа сенбеуге және кез келген мәліметті тек ресми дереккөздерден алуға шақырды.
