Әлеуметтік желі мен БАҚ-та салықты толық төлемеген танымал әнші, блогер және журналистердің тізімі тарап, солардың арасында саясаткер Мұхтар Тайжан да бар екені белгілі болды. Осыған байланысты ол өз пікірін білдірді, ,деп хабарлайды Todayinfo агенттігі.
Тайжанның айтуынша, 2022 және 2023 жылдары жалпы 20 млн теңге шамасында табыс көрсетілген, алайда бұл қаражат жарнамадан түскен табыс ретінде қате есептелген. Ол барлық қаржының жеке аударымдар екенін, оның ішінде отбасылық төлемдер, депозиттерден алынған қаражат және банкоматтан қолма-қол толықтырулар бар екенін атап өтті.
«Салық органдары мені жасырын жарнама жасады деп күдіктеніп, барлық банктік карталарымдағы қаржы айналымын тексеруді сұратқан. Бірақ ешбірі заңды тұлғалардан түскен жоқ. Барлығы – жеке аударымдар», – деді Тайжан.
Саясаткердің айтуынша, оған 2022-2023 жылдардағы барлық аударымдар бойынша құжаттық есеп беру үшін 1 ай уақыт берілген. Ол салықтық тексеру нәтижелерін кейінірек жариялайтынын мәлімдеді.
