Дәрігерлер қауіпті диагноз қойылған 71 жастағы қарияның жүрегіне ота жасап, аман алып қалды, деп хабарлайдыTodayinfo.
Алматы Қалалық кардиологиялық орталығына келіп түскен науқас қатты ентігу мен бүкіл бойын алған әлсіздікке шағымданған.
Мамандар науқасқа қолқа қақпақшасының айқын стенозы деген диагноз қойды.
Қолқа стенозы — жүрек қақпақшасының тарылуы, ол арқылы жүректен қан қолқаға еніп, одан әрі бүкіл денеге таралады. Қолқа қақпақшасының стенозы кезінде органдарға қан жетпейді. Бұл диагноз аз уақыт ішінде адамды өлімге душар етуі мүмкін. Егер емделмесе, пациенттің сырқаты асқынып миокард инфарктісі, ми ишемиясы және инсультқа әкеп соқтырады.
Науқасқа шұғыл жасалды. Оның қолқа қақпасы кеуде қуысын кесусіз феморальды артериядағы кішкене пункция арқылы TAVI отасы барысында ауыстырылды. Отаның бұл түрі хирургиялық араласуды кесусіз және ең аз оңалту кезеңімен жүргізуге мүмкіндік береді. Транскатетерлі қолқа клапанын имплантациялау (TAVI) — қолқа клапанын ауыстыратын минималды инвазивті процедура.
«Ота жергілікті ауырсынуды басу арқылы жасалды, бұл пациенттің ота кезінде есін сақтауға мүмкіндік беріп, мидың күйін бақылауға және жедел цереброваскулярлық бұзылыс түріндегі ықтимал асқынудың алдын алуға мүмкіндік берді. Төс сүйегінің кесілмеуі, жасанды қан айналымы қажетсіздігі, минималды жарақат және тез қалпына келу — TAVI отасының негізгі артықшылығы. Отадан 3 күн өткен соң науқас ауруханадан үйге шығарылды. Ентігу толығымен жойылып, жалпы әл-ауқаты айтарлықтай жақсарды», — дейді Қалалық кардиологиялық орталықтың интервенциялық кардиологы Айжан Құланбаева.
Мұндай TAVI оталар маңызды, өйткені оларды денсаулық жағдайына байланысты ашық жүрек отасын жасай алмайтын науқастарға жасауға болады. Бұл операция бауыр мен бүйрек қызметі бұзылған, сондай-ақ жүрек пен өкпенің ауыр ауруы бар егде жастағы науқастар үшін маңызды. Себебі жүрекке ашық отаны көптеген егде жастағы адам қосымша ауруларының болуына байланысты көтере алмайды.
Фото: ашық дереккөзден
Todayinfo.kz
