Қазақстанда халықтың қартаюы қарқын алуда. Energyprom.kz сарапшыларының мәліметінше, қартаю индексі (100 балаға шаққандағы зейнеткерлер саны) 2021 жылғы 26,7-ден 2025 жылы 32,9-ға дейін өскен, яғни әрбір 100 балаға 33 қарт адамнан келеді, деп хабарлайды Todayinfo ақпарат агенттігі.
Қалаларда бұл көрсеткіш 28,8-ден 34,9-ға, ал ауылдық жерлерде 23,9-дан 29,6-ға дейін көтерілген. Сарапшылардың пікірінше, бұл ұрпақтар арасындағы алшақтықтың азайып бара жатқанын көрсетеді.
Ең ауыр жағдай солтүстік және орталық өңірлерде байқалады. Солтүстік Қазақстан облысында индекс 84,1-ге, Шығыс Қазақстан облысында 80,7-ге, Қостанай облысында 71,3-ке жеткен. Бұл аймақтарда қарттар саны балалар санына жақындаған.
«Қарттар санының күрт өсуі және туу көрсеткішінің төмендеуі еңбек нарығына, медицинаға және әлеуметтік жүйеге үлкен жүктеме түсіреді. Жүйелі шешімдер қабылданбаса, жағдай қымбатқа түседі», — деп ескертеді сарапшылар.
Туу коэффициенті 2021 жылғы 23,5-тен 2025 жылы 16,4-ке дейін төмендеген (мың адамға шаққанда). Қалаларда бұл көрсеткіш 23,2-ден 15,8-ге, ауылда 23,8-ден 17,5-ке кеміген. Тіпті дәстүрлі «жас» аймақтарда — Түркістан (22,2) және Маңғыстау (21,4) облыстарында да туу азайып келеді.
