Қазақстандық мемлекеттік облигацияларды әлемдегі ең ірі депозитарийлердің бірі Euroclear жүйесіне қосу жоспарлануда. Бұл туралы Ұлттық Банк мәлімдеді.
Ұлттық Банктің ақпаратынша, бұл үшін қазақстандық бағалы қағаздар нарығының инфрақұрылымымен тікелей байланыс арнасы құрылады. Осыдан кейін шетелдік инвесторлар қазақстандық мемлекеттік облигацияларды Euroclear арқылы тікелей сатып ала алады. Бұл қазіргі уақытта жұмыс істеп тұрған Clearstream арнасына қосымша мүмкіндік болады.
Ұлттық Банкте атап өткендей, жоба мемлекеттік бағалы қағаздар нарығының өтімділігін арттыруға, инфрақұрылымдық кедергілер мен операциялық шығындарды азайтуға, сондай-ақ шетелдік инвесторлардың Қазақстанға деген қызығушылығын күшейтуге мүмкіндік береді.
Euroclear — әлемдегі ең ірі қаржы депозитарийлерінің бірі. Компания шамамен 40,7 триллион евролық активтерді сақтайды, 3 800-ге жуық клиентке қызмет көрсетеді және жыл сайын 331 миллионға жуық транзакция жүргізеді.
Бұған дейін Ұлттық Банк төрағасы Тимур Сүлейменов теңгенің нығаюына қатысты түсініктеме берген болатын. Оның айтуынша, мұнайдың жоғары бағасы валюталық түсімді арттырып, нарықта оң күтулер қалыптастырады. Сондай-ақ маусымдық фактор да әсер етеді: жылдың алғашқы айларында валютаға сұраныс төмен болады, ал инвестициялық бағдарламалардың белсенділігі мен импортқа сұраныстың өсуі жазға қарай басталады.
