Фото: 7kun.kz
Қазақстанда телефон алаяқтарының құрбанына айналған тағы бір белгілі тұлға анықталды. «ҚазМұнайГаз» ұлттық компаниясының бұрынғы аппарат басшысы Александр Черепанов алаяқтарға 662 мың АҚШ доллары мен шамамен 90 миллион теңгесін беріп қойған, деп хабарлайды Todayinfo.kz ақпарат агенттігі.
Бұл іс бойынша үкім Астанада Жаңа жыл қарсаңында шықты.
Алаяқтарға «курьер» болғандар
Сот Өзбекстан азаматтары – 19 жастағы Тимур Куралбаев пен 24 жастағы Музафар Каршибаевты кінәлі деп таныды. Олар Қазақстанға арнайы ұшып келіп, телефон алаяқтарына көмектескен.
Оларға берілген тапсырма қарапайым болған:
— жәбірленушілерден ақша салынған сөмкелерді алып кету;
— қаражатты басқа адамдарға жеткізу немесе банк арқылы аудару.
Тергеу барысында олардың бірнеше ел арасында еркін жүріп, ұзақ уақыт бойы ұстатпай келгені анықталған. Алайда қазақстандық полицейлер күдікке алып, ұстағаннан кейін қылмыстың беті ашылған.
Алаяқтар қалай арбаған?
Белгілі болғандай, жәбірленушілердің бірі — «ҚазМұнайГаздың» ардагері Александр Михайлович Черепанов. Ол ұлттық компанияда ұзақ жылдар бойы аппарат басшысы қызметін атқарған. Биыл 70 жасқа толады.
Қылмыскерлер оның жасына және сенгіштігіне әдейі басымдық берген. Алдымен Черепановтың телефонына өзін жақсы танитын «әріптесінің» атынан хабарлама келген. Онда ҚМГ-дағы деректердің таралуы мен терроризмге қатысты қылмыстық іс тергеліп жатқаны айтылған.
Кейін «құқық қорғау органдарының қызметкерлері» хабарласып, жинаған қаражатын «қылмыскерлерден қорғап қалу үшін» көмектесетінін жеткізген.
Пәтерін де сатып жіберген
Қорқытып-үркіту нәтижесінде Александр Черепанов бірнеше күн ішінде:
-
түрлі банктердегі барлық жинағын шешіп алған;
-
тіпті пәтерін сатып, ақшаны курьерлерге қолма-қол тапсырған.
Осы қаражаттың бір бөлігі Каршибаев пен Куралбаевтың қолынан өткен.
Сонымен қатар, полицейлер бұл екі азаматтың тағы бір жәбірленуші — егде жастағы әйелді алдауға қатысы барын да анықтаған.
Үкім шықты, бірақ ақша қайтпады
Сот үкімімен Өзбекстан азаматтары алаяқтық жасағаны үшін кінәлі деп танылып, әрқайсысы 6 жылға бас бостандығынан айырылды.
Алайда жәбірленушілердің қаражаты шетелге шығарылып кеткен, қазіргі уақытта ол ақша қай елде екені белгісіз.
Ескерту
Мамандар азаматтарды, әсіресе егде жастағы туыстарын телефон алаяқтары туралы алдын ала ескеруге шақырады. Себебі мұндай қылмыстарды ұйымдастырушылар әлі де бостандықта.
