Ресей 8-10 мамыр аралығында майданда уақытша атысты тоқтатуды жариялады, бірақ бітім бұзылған жағдайда Киевке жаппай соққы беруі мүмкін екенін ескертті, деп хабарлайды Todayinfo ақпарат агенттігі.
Ресей Қорғаныс министрлігі 8 мамыр сағат 00:00-ден 10 мамыр сағат 00:00-ге дейін ресейлік әскерлердің ұрыс қимылдарын толығымен тоқтатып, Украина аумағындағы нысандарға соққы бермейтінін мәлімдеді. Бұл шешім Жеңіс күнін мерекелеуге байланысты қабылданған.
Сонымен қатар, зымыран әскерлері мен артиллерия, теңіз және әуе базасынан ұзақ қашықтыққа ұшатын жоғары дәлдіктегі қарулар, сондай-ақ соққы беретін ұшқышсыз ұшу аппараттарымен Украина Қарулы Күштерінің орналасқан жерлеріне және әскери-өнеркәсіптік кешенге, сондай-ақ Украина аумағының тереңіндегі қарулы күштерге қатысты инфрақұрылым нысандарына соққы беру тоқтатылады.
Ресейдің әскери ведомствосы Украина тарапын осы үлгіні ұстануға шақырды. Алайда, бітім бұзылған жағдайда ресейлік әскердің «адекватты жауап» беретіні атап өтілді.
«Егер Украина Ұлы Отан соғысындағы Жеңістің 81 жылдығын тойлауды бұзуға тырысса, Киевтің орталығына жаппай зымыран соққысы жасалады», — деп мәлімдеді бұған дейін Ресей Сыртқы істер министрлігінің ресми өкілі Мария Захарова.
Украина президенті Владимир Зеленский жағдайға түсініктеме бере отырып, Ресейдің әрекеттеріне «айна қатесіз» жауап беретінін уәде етті. Ол сондай-ақ шетелдік көшбасшыларға Мәскеудегі шеруге бармауға кеңес берді.
