Көкшетауда 1000 адамға арналған ірі спорт кешені салынып жатыр

Ақмола облысы бұқаралық спорт бойынша елімізде тұрақты түрде үздік үштікке кіріп келеді. Бүгінде өңірде 236 мыңнан астам адам спортпен шұғылданады. Бұл саланың одан әрі дамуы мен спорт инфрақұрылымының қолжетімділігін арттыру мақсатында ауқымды жобалар жүзеге асырылуда. Соның ең ірісі Көкшетау қаласында салынып жатқан көпфункционалды спорт кешені, деп хабарлайды Todayinfo ақпараттық агенттігі. Жаңа нысан 1000 адамға арналған және кәсіби спортшыларды даярлауға, бұқаралық іс-шараларды өткізуге арналған маңызды алаңдардың біріне айналады. Жобаның жалпы құны 13,6 млрд теңгені құрайды. Оның 12,7 млрд теңгесі елге заңсыз жолмен шығарылып, қайтарылған активтер есебінен құрылған Арнайы мемлекеттік қордан, ал 2024 жылы жергілікті бюджеттен 620 млн теңге, 2025 жылы тағы 293 млн теңге қарастырылған. Жоба аясында: 650 орындық спорт-сауық залын, скалодром орнатуға мүмкіндік беретін әмбебап залды, бокс, күрес, ауыр атлетика, кроссфит және атуға арналған арнайы залдарды, өрт-құтқару спортына арналған мұнараны, теннис үстелдері бар вестибюльді және кафетерийді салу жоспарланған. Сонымен қатар, кешен аумағын абаттандыруға ерекше көңіл бөлінуде: ойын және жаттығу аймақтары, жеңіл атлетика секторы, жылдың кез келген мезгілінде пайдалануға болатын әмбебап спорт алаңдары қарастырылған. Ақмола облысының құрылыс, сәулет және қала құрылысы басқармасының мәліметінше, бұл спорттық кешен өңірде заманауи нысандар тапшылығын айтарлықтай азайтып, кәсіби спортшылар мен әуесқойлар үшін жаттығу сапасын арттыруға мүмкіндік береді. Нысан құрылысын осы жылдың соңына дейін аяқтау жоспарланып отыр. Бұл жаңа спорт және белсенді демалыс орталығы Ақмола облысындағы салауатты өмір салты мен спорт мәдениетін дамытуға қосылатын маңызды үлес болмақ.