Абай облысында маңызды кадрлық ауыс-түйіс орын алды. Жанжігіт Омархан Абай облысының Мəдениет, тілдерді дамыту және архив ісі басқармасы басшысының міндетін атқарушы қызметіне тағайындалды. Бұл туралы Todayinfo ақпарат агенттігі хабарлайды.
Бұл тағайындау облыстың мәдениет саласына жаңа серпін беретін бастама ретінде бағалануда. Жаңа басшының басты міндеті – аймақтағы мәдени мұраны сақтау, ана тіліміздің қолдану аясын кеңейту және архив ісін заманауи талаптарға сай дамыту. Сонымен қатар, өңірдегі мәдениет ұйымдарының жұмысын жүйелеу мен ұлттық құндылықтарды дәріптеу де негізгі бағыттардың бірі болмақ.
Жанжігіт Омархан Шәкәрім атындағы Семей мемлекеттік университетінде «Журналистика» және «Құқықтану» мамандықтары бойынша білім алған. Сондай-ақ, Қазақ инновациялық гуманитарлық-заң университетін «Мемлекеттік және жергілікті басқару» мамандығ бойынша тәмамдаған.Л.Н. Гумилев атындағы Еуразия ұлттық университетінің «Журналистика» мамандығы бойынша магистратурасын бітірген. Еңбек жолын 2009 жылы «Астана» телеарнасында бастап, журналист-редактор және бағдарламалар жүргізушісі болып жұмыс істеді. 2011-2015 жылдар аралығында «QAZAQSTAN» ұлттық телеарнасы мен «Еуразия - Бірінші арнасында» бағдарламалар мен ток-шоулар жүргізді. 2016 жылы – «Астана» телеарнасының «Өзекті» авторлық бағдарламасының жетекшісі және жүргізушісі. 2018-2019 жылдары – Жамбыл облысының «Өңірлік коммуникациялар қызметі» коммуналдық мемлекеттік мекемесінің басшысы, «ҚазАвтоЖол» ҰК» АҚ баспасөз қызметінің жетекшісі. 2019 жылдан 2021 жылға дейін – Қазақстан Республикасы Ауыл шаруашылығы министрінің баспасөз хатшысы қызметiн де атқарды.
