Lamborghini Urus, Lexus LX 600, 247 млн теңге: блогер Жанабыловтар сот санкциясымен қамалды

Белгілі блогерлер Ерболат Жанабылов пен Эльмира Төлегеноваға қатысты тергеу аяқталып, іс сотқа жолданды. Ерлі-зайыптылар заңсыз кәсіпкерлікпен айналысты және ақша жылыстатқандары үшін айыпталып отыр, деп хабарлайды Todayinfo ақпарат агенттігі. Қаржылық мониторинг агенттігінің мәліметінше, олар Instagram желісіндегі 15 миллионнан астам оқырманының сенімін пайдаланып, заңсыз табыс тапқан. Блогерлер онлайн-курс сатқан, бірақ адамдар оны білім алу үшін емес, қымбат көліктер мен ақшалай сыйлықтар ойнатылатын ұтыс ойынына қатысу үшін сатып алған.

"Тексеру барысында курстардың ешқандай білім беру құндылығы болмағаны анықталды. Бейнесабақтардың бір бөлігі YouTube сияқты ашық дереккөздерден алынып, заңсыз лотереяны бүркемелеу үшін ғана қолданылған. Сыйлықтар блогерлердің жеке қаражатынан емес, қатысушылардың өз ақшасынан төленген. Сондай-ақ электронды "сәттілік барабаны" көбіне 5 000 теңгелік ұтыс түсетіндей етіп бапталғаны, ал қымбат жүлделерді ұтып алу мүмкіндігі әдейі төмендетілгені белгілі болды", — деп хабарлады Қаржылық мониторинг агенттігі.

Сонымен қатар, блогерлер оқырманын көбейту мақсатында ең көп репост жасаған қатысушыға 11-ші көлікті сыйға тартамыз деп уәде берген. Алайда жеңімпаз анықталмай, көлік ешкімге берілмеген. Нәтижесінде олардың бақылауындағы «Zhana Business» ЖШС шотына 247,5 млн теңге түскен. Оның 60 млн теңгесі депозиттерге салынған. Сот шешімімен 10 автокөлік, оның ішінде Lamborghini Urus пен Lexus LX 600, сондай-ақ 17 iPhone телефоны бұғатталды. Қазіргі уақытта күдіктілерге қатысты «үйқамақ» бұлтартпау шарасы тағайындалып, олар іс материалдарымен танысып жатыр. Фотоколлаж: Azattyq Rýhy