Иранда төрт қала жарылды: бұл газ емес, Израильдің арнайы операциясы болуы мүмкін

Иранның бірнеше ірі қаласында бір мезгілде бірнеше жұмбақ жарылыс болды. Ресми билік оқиғаны газдың жарылуымен байланыстырса, жергілікті дереккөздер бұл Израильдің арнайы операциясы болуы мүмкін екенін жазуда, деп хабарлайды Todayinfo ақпарат агенттігі. Жарылыстар Тегеран, Бандар-Аббас, Ахваз және Тебриз қалаларында тіркелген. Салдарынан үш тұрғын үй мен бір көлік қирап, қаза тапқандар мен жарақат алғандар бар екені хабарланды. Иран билігі оқиғаны тұрмыстық газдың жарылуы деп түсіндірді. Алайда, парсы тіліндегі Telegram-арналар бұл нұсқаға үзілді-кесілді қарсы шығып отыр. Олардың пайымдауынша, жарты сағат ішінде елдің төрт түрлі аймағында бір уақытта газ жарылуы мүмкін емес.

"Бұл – Израильдің Ислам революциясы сақшылар корпусының (ІРСК) бірнеше жоғары лауазымды тұлғасына жасаған қастандығы. Жарылыстар кездейсоқ емес, нақты жоспарланған террористік акт", – деп жазады жергілікті дереккөздер.

Өз кезегінде Израиль билігі бұл оқиғаларға еш қатысы жоқ екенін ресми түрде мәлімдеді. Фото: Әлеуметтік желіден