2026 жылғы 1 қаңтардан бастап Қазақстанда жәрдемақылар, базалық және ынтымақты зейнетақы 10% өседі. Жаңа мөлшерлер мен мысалдар.
2026 жылғы 1 қаңтардан бастап Қазақстанда мемлекеттік жәрдемақылардың барлық түрі, сондай-ақ базалық және ынтымақты зейнетақы 10% ұлғаяды. Бұл өсім ҚР Ұлттық Банкі айқындайтын инфляцияның болжамды деңгейіне сай жоспарланып отыр.
Бұл туралы
Todayinfo порталы хабарлайды.
Соңғы жылдары зейнетақы жүйесінде базалық төлемді кезең-кезеңімен көтеру бағыты сақталып келеді. 2023 жылдан бастап бес жыл ішінде ең төменгі базалық зейнетақыны ең төменгі күнкөріс деңгейінің 70%-ына дейін жеткізу, ал ең жоғарғысын 120%-ға дейін арттыру көзделген.
Базалық зейнетақы 2026 жылы қанша болады?
2026 жылғы 1 қаңтардан бастап базалық зейнетақының ең төменгі мөлшері 35 596 теңге болады. Бұл – ең төменгі күнкөріс деңгейінің 70%-ына тең көрсеткіш.
Ал базалық зейнетақының ең жоғарғы мөлшері ең төменгі күнкөріс деңгейінің 110%-ынан 118%-ына дейін өсіп, 60 005 теңгені құрайды.
Зейнетақы қалай өседі: нақты мысал
Нақты мысал келтірсек: 2019 жылы зейнетке шыққан 70 жастағы зейнеткердің бюджеттен төленетін жалпы зейнетақысы 2025 жылы 171 588 теңге болған. Оның ішінде базалық зейнетақы төлемі – 50 851 теңге, ал ынтымақты зейнетақы – 120 737 теңге.
2026 жылғы 1 қаңтардағы 10% өсімді ескергенде, бұл зейнеткердің зейнетақысы 192 816 теңгеге дейін ұлғаяды. Соның ішінде базалық зейнетақы – 60 005 теңге, ынтымақты зейнетақы – 132 811 теңге болады.
Маңызды ескерту: бұл сандарға БЖЗҚ-дан (жинақтаушы зейнетақы жүйесі) төленетін төлемдер кірмейді.
Жәрдемақыларға да 10% қосылады
2026 жылдан бастап мемлекет төлейтін жәрдемақылар да 10% артады. Мысалы, бала тууына байланысты берілетін біржолғы төлемдерде өсім қарастырылған.
1, 2 немесе 3 бала туған кезде берілетін жәрдемақы 149 416 теңгеден 164 350 теңгеге дейін өседі. Ал 4 және одан көп бала туған кезде берілетін төлем 247 716 теңгеден 272 475 теңгеге дейін ұлғаяды.
Көпбалалы отбасыларға арналған жәрдемақы да өседі: 4 баласы бар отбасылар үшін 63 030 теңгеден 69 330 теңгеге дейін көтеріледі. 10 баласы бар отбасылар алатын төлем 157 280 теңгеден 173 000 теңгеге дейін ұлғаяды.
Мүгедектігі бар адамдарға төленетін жәрдемақылар бойынша да жаңа мөлшерлер бар. I топтағы мүгедектігі бар адамдарға арналған жәрдемақы 101 702 теңгеден 111 872 теңгеге дейін өседі.
II топ үшін төлем 81 362 теңгеден 89 498 теңгеге дейін, III топ үшін 55 474 теңгеден 61 021 теңгеге дейін артады.
Сонымен бірге Мемлекеттік әлеуметтік сақтандыру қорынан (МӘСҚ) төленетін асыраушысынан айырылу және еңбек ету қабілетінен айырылу бойынша әлеуметтік төлемдер де 10% көбейеді. Бұл төлемдер міндетті әлеуметтік сақтандыру жүйесіне қатысушыларға бюджеттен төленетін мемлекеттік жәрдемақыларға қосымша ретінде беріледі.
