2026 жылдан БЖЗҚ төлемі 5% өседі: ең төменгі айлық сома 50 851 теңге

2026 жылғы 1 қаңтардан бастап БЖЗҚ-дан ай сайын төленетін зейнетақы төлемдері 5 пайызға ұлғаяды. Бұл қазірдің өзінде төлем алып жүрген азаматтарға да қатысты, деп хабарлайды Todayinfo ақпарат агенттігі. Қор төлемді бекітілген әдістеме бойынша есептейді. Алғаш рет төлем рәсімдейтін адамның жинағы 6,5 пайызға көбейтіледі де, шыққан сома 12 айға бөлінеді. Келесі жылдары ай сайынғы төлем мөлшері 5 пайыз индекстеумен өсіп отырады. Ай сайынғы ең төменгі төлем ең төменгі күнкөріс деңгейінің кемінде 70 пайызына тең. 2026 жылы бұл сома 50 851 теңге болады. Ең жоғары төлемге шектеу қойылмайды. Қанша алатыныңыз жеке зейнетақы шотында жиналған қаражат көлеміне тікелей байланысты. Кейбір азаматтарға түзету коэффициенті қолданылады. Оған I немесе II топ мүгедектігі бар адамдар және қорға кемінде 60 ай жарна аударған зейнеткерлер кіреді.

Егер екі талап бір адамға қатар келсе, ең жоғары коэффициент қолданылады.

Төлемдер жеке шоттағы қаражат толық біткенге дейін аударылады. Зейнетақы жинағы азаматтың меншігі саналады және заңға сай мұрагерлеріне беріледі.