«Әйелін шәкіртіне сыйлаған»: сақалды діңкеш жазаланды

Екінші әйелін шәкіртіне үйлендіріп жіберген имам жазаланды, деп хабарлайды Todayinfo.kz ақпараттық порталы. Қазақстандық имам, хазрет, теолог-ғалым Құрбанәлі Ахмет Жанар Байсемізге берген сұхбатында екінші әйелін өзінің сұрауымен шәкіртіне үйлендіргенін айтқан еді. Сонымен қатар ол әйелді қайын атасынан сыйлыққа алғанын жасырмаған. Осыған байланысты полиция тексеру жүргізді.

«Қоғамдық кеңістікте өзін діни ағым өкілі ретінде таныстырған азаматтың қатысуымен түсірілген бейнематериалдың таралуына байланысты Алматы қаласының мемлекеттік органдары тарапынан тиісті тексеру жүргізілді. Тексеру нәтижесінде сұхбат барысында Қазақстан Республикасының қолданыстағы заңнамасына қайшы келетін (соның ішінде әйелдерінің бірін шәкіртіне беру туралы) пікірлер айтылғаны, сондай-ақ қоғамдық сана мен конфессияаралық келісімге кері әсер етуі мүмкін мәселелер қозғалғаны анықталды»,- делінген хабарламада.

Алматы қаласы Дін істері басқармасы өз құзыреті шеңберінде аталған азаматқа қатысты шаралар қабылдап, ол Қазақстан Республикасының Әкімшілік құқық бұзушылық туралы кодексінің 490-бабы бойынша діни қызмет саласындағы заңнаманы бұзғаны үшін әкімшілік жауапкершілікке тартылып, айыппұл салынды. Сонымен қатар, аталған азаматтың ресми діни қызметкерлер қатарына жатпайтыны белгілі болды. Фото: скрин