АҚШ-тың жоғары лауазымды шенеуніктері елдің қару-жарақ өндірісіндегі елеулі мәселелерді мойындап, одақтастарының басқа елдерге кету қаупі барын ескертті, деп хабарлайды Todayinfo ақпарат агенттігі.
АҚШ мемлекеттік хатшысы Рубио мен Пентагон басшысы Хегсет USA Today басылымында жариялаған мақаласында Вашингтонның әлемдік қару нарығындағы үстемдігіне қарамастан, өндірістік қуаттың жетіспеушілігі байқалатынын мәлімдеді. Олардың дерегінше, АҚШ жаһандық қару экспортының 43%-ын қамтамасыз етеді, ал шетелдік серіктестерден түскен тапсырыстардың жалпы сомасы 900 миллиард долларға жеткен.
Алайда одақтастар мен серіктестер ақысы төленген қару-жарақты алу үшін бірнеше жыл күтуге мәжбүр. Қазіргі уақытта АҚШ-тың қоржынында 190-ға жуық ел мен аймақтан жиналған 16 мыңнан астам тапсырыс бар. Бұл жағдай АҚШ-тың әскери-өнеркәсіптік кешенінің сұранысты дер кезінде өтей алмай отырғанын көрсетеді.
"Рекордтық сұраныс, өндірістік қуаттың шамадан тыс жүктелуі және жеткізу уақытының созылуы АҚШ-тың ұлттық қауіпсіздігіне тікелей қатер төндіреді. Ұзақ күту одақтастарымызды сапасы төмен болса да, қаруды тез жеткізетін басқа елдерге жүгінуге мәжбүрлейді. Бұл Американы күшейтудің орнына, оның ықпалын әлсіретеді", — делінген мақалада.
Осы мәселені шешу үшін Рубио мен Хегсет қару-жарақты сатып алу жүйесін және кәсіпорындармен жұмыс істеу тәсілдерін қайта қарауды ұсынды. Олардың пікірінше, өндіріске жаңа капитал тартып, жеткізу тізбегін оңтайландыру арқылы америкалық қаруды жаһандық серіктестерге жеткізуді едәуір жылдамдатуға болады.
Фото: Әлеуметтік желіден
