Астананың халықаралық әуежайы 13 әуе рейсінің кестесіне өзгеріс енгізді: 12 бағытта ұшулар кешігіп, Түркістаннан келетін бір рейс тоқтатылды, деп хабарлайды Todayinfo ақпарат агенттігі.
Әуежай мәліметінше, келу бағытында жеті рейс уақытынан кеш келеді. Сонымен бірге Түркістаннан Астанаға қатынауы тиіс бір ұшақ мүлде ұшпайтын болып шешілді.
Ұшып шығу бағытында бес рейс кешігеді. Әуежай өкілдері екі бағыттағы кешігуді ауа райымен, ал үш бағыттағы өзгерісті ұшақтардың Астанаға кеш келуімен түсіндірді.
Шымкент пен Қостанайға ұшатын рейстер межелі әуежайларда қолайсыз ауа райы болғандықтан ұша алмай тұр.
Қызылорда, Алматы және Камрань бағытындағы ұшуларды авиакомпаниялар ұшақтардың алдыңғы рейстерден кешігіп келуіне байланысты кейінге қалдырды.
"Келу бағытындағы кешігулердің себептерін ұшып шыққан әуежайлар мен авиакомпаниялар айқындайды", – деп хабарлады Астана әуежайы.
Фото: Әлеуметтік желіден
