Астанада түнгі клуб маңында 18 жастағы жігіт пышақ жарақатынан қаза тапты. Оқиға жұмадан сенбіге қараған түні болғаны айтылады.
Бұл туралы Todayinfo порталы хабарлайды.
Куәгерлердің жазуынша, марқұм — Семей қаласының 18 жастағы тұрғыны. Әлеуметтік желіде тараған мәліметтерде клуб маңына полиция көптеп жиналып, келушілер эвакуацияланғаны көрсетілген.
Оқиғаның нақты себептері мен мән-жайы ресми түрде әлі нақтыланбаған. Пайдаланушылардың көпшілігі тергеудің ашық жүргізілуін және қауіпсіздік шараларының күшейтілуін талап етіп жатыр.
Желіде клубтың жұмысына қатысты наразылық күшейді
Оқиғадан кейін қазақстандықтар 2GIS платформасында аталған түнгі клубтың жабылуын талап ете бастады. Пікірлерде қауіпсіздік мәселесін бірінші орынға қою керектігі жиі айтылады.
Кей қолданушылардың айтуынша, қайғылы жағдайға қарамастан, клуб жұмысын тоқтатпай, әлеуметтік желідегі парақшаларында stories жариялауды жалғастырған. Бұл да жұрттың ашуын туғызды.
2GIS-тағы пікірлерге байланысты күдік айтылды
Желі қолданушылары 2GIS-та пікірлердің «реттеліп» жатқаны туралы да жазып жатыр. Олардың сөзінше, жағымды пікірлер көбейіп, жағымсыз жазбалар төменге ығыстырылуы мүмкін деген күдік бар.
Қоғам белсенділері мен қала тұрғындары мұндай орындарда күзет, тексеру, келушілердің қауіпсіздігін қамтамасыз ету талаптарын қайта қарау керек дейді. Ал оқиғаға қатысты ресми ақпарат жарияланса, материал жаңартылатын болады.
