Солтүстік өңірде қыс қаһарына мінді. 9 желтоқсан, сейсенбі күні Қостанай облысының кейбір аудандарында ауа райының күрт бұзылуына байланысты оқушылар мектепке бармайтын болды. Бұл туралы аудандық білім бөлімі ресми хабарлады, деп жазды Todayinfo.
Атап айтқанда, Ұзынкөл ауданында күн райының қолайсыздығы оқу процесіне өзгеріс енгізді. Қатты аяз бен желдің күшеюіне байланысты бірінші ауысымдағы сабақтар онлайн форматқа ауыстырылды.
Шектеу келесі білім ошақтарының шәкірттеріне қатысты:
-
Ұзынкөл №1 орта мектебі;
-
К. Дөненбаева атындағы мектеп;
-
Троебрат мектебі.
Бұл мектептердегі мектеп алды даярлық топтары мен 1-4 сынып оқушылары бүгін сабақты үйден оқиды. Ал қалған сыныптар мен басқа білім беру мекемелері штаттық режимде жұмыс істей береді.
Синоптиктер не дейді?
"Қазгидромет" мамандарының болжамы көңіл көншітпейді. Бүгін түнде облыстың басым бөлігінде қар жауып, жаяу бұрқасын соғады деп күтілуде. Өңірдің солтүстігі мен шығысында желдің екпіні секундына 15-20 метрге дейін жетеді.
Ауа температурасы түнде және күндіз 18-23 градус аязды көрсетіп тұр. Ал облыстың солтүстік аумағында сынап бағанасы -26 градусқа дейін төмендеуі мүмкін. Оңтүстікте сәл жылырақ (-13 градус), бірақ көктайғақ болу қаупі бар.
Қостанайдағы жағдай қандай?
Еске сала кетейік, бұған дейін Қостанай қаласында жағдай басқаша болған еді. 25 қарашадан бастап облыс орталығындағы мектептер мен колледждер ЖРВИ және тұмау ауруының өршуіне байланысты қашықтан оқытуға көшкен болатын.
Алайда эпидемиологиялық ахуал тұрақталған соң, 8 желтоқсаннан (дүйсенбі) бастап қала оқушылары дәстүрлі форматқа, яғни мектеп қабырғасына қайта оралды. Енді оқушылардың сабаққа қатысуына тек ауа райы ғана кедергі келтіруі мүмкін.
Алдағы күндері Қазақстанның басқа өңірлерінде де 35 градусқа дейін аяз болады деп болжануда.
