Мәдениет және ақпарат министрі Аида Балаева ЛГБТ насихатына тыйым салатын заңның жаңа Конституцияға сәйкестендірілетінін мәлімдеді.
Қазақстанда ЛГБТ насихатына тыйым салуды көздейтін заң жаңа Конституцияға сәйкестендіру аясында қайта қаралуы мүмкін. Бұл туралы вице-премьер – Мәдениет және ақпарат министрі Аида Балаева мәлімдеді, деп хабарлайды Todayinfo ақпарат агенттігі.
Министрдің айтуынша, оның ведомствосы заңнаманы жаңа Конституция талаптарына сәйкес келтіру үшін жалпы 20 заңға түзетулер енгізбек. Өзгерістер «Архив ісі туралы», «Массмедиа туралы» сияқты маңызды заңдарды да қамтиды.
«Бұл түзетулер негізгі конституциялық қағидаттарды жүзеге асыруға бағытталған. Атап айтқанда, олар тарихи-мәдени мұраны сақтау, ұлттық мәдениетті қолдау, отбасы институтын нығайту және азаматтық қоғамды дамыту сияқты маңызды бағыттарды қамтиды», - деп түсіндірді Аида Балаева.
Сонымен қатар, министр азаматтардың ар-намысын, қадір-қасиетін және іскерлік беделін қорғаудың құқықтық тетіктері күшейтілетінін атап өтті.
«Бұл шаралар пікір білдіру бостандығы мен адамның конституциялық құқықтарын қорғау арасындағы тепе-теңдікті қамтамасыз етуге мүмкіндік береді», - деді үкімет мүшесі.
Фото: Әлеуметтік желіден
