Қазақстан банктерінде клиенттерді биометриялық деректер арқылы сәйкестендірудің жаңа ережелері күшіне енді. Енді қаржылық операцияларды растау немесе қосымшаға кіру үшін күрделі тексерістен өту қажет, деп хабарлайды Todayinfo ақпарат агенттігі.
Жаңа тәртіп бойынша клиенттің жеке басын растау процесі төрт кезеңнен тұрады. Алдымен жүйе адамның сол сәттегі бет-бейнесін сканерлейді, одан кейін оның жеке сәйкестендіру деректерін тексереді. Содан соң алынған суретті базадағы эталонды нұсқамен салыстырып, сәйкестігін анықтайды.
Ең басты жаңалық – алаяқтықтан қорғану шараларының күшейтілуі. Енді клиенттен камера алдында кемінде үш түрлі әрекет жасау талап етіледі. Мысалы, басын оңға немесе солға бұру, көзін жыпылықтату немесе күлімсіреу сияқты қимылдар сұралуы мүмкін. Бұл шара алаяқтардың бөтен адамның суретін немесе видеосын қолдануына жол бермеу үшін енгізілген.
Егер клиент тексеріс кезінде үш рет қателессе, сәйкестендіру процедурасы сәтсіз аяқталады және жүйе операцияны тоқтатады. Дегенмен, клиентке қолжетімділікті ашу немесе жабу туралы соңғы шешімді әр банк немесе микроқаржы ұйымы өз ішкі қауіпсіздік ережелеріне сүйеніп қабылдайды.
Банктердің мәліметінше, бұл шаралардың барлығы клиенттердің деректерін қорғауға және интернет-алаяқтық деңгейін төмендетуге бағытталған. Сондай-ақ, барлық биометриялық ақпарат шифрланған түрде сақталады және бағдарламалық жасақтама бұзудан толық қорғалған.
Фото: Әлеуметтік желіден
