Фото: видео скриншот
Журналист Диас Нұрақын Жетісайдағы сұмдық өртке байланысты өз үнін қосты. Оның айтуынша, бірнеше әкім мен депутаттың әлеуметтік желідегі жазбалары бір жерден көшірілгендей: әрқайсысы «Президенттің тапсырмасымен комиссия құрылды», «Президенттің тапсырмасымен себеп анықталады», «Президенттің тапсырмасымен көмек көрсетіледі» деп қайталаумен әлек, деп хабарлайды Todayinfo.kz ақпарат агенттігі.
Диас Нұрақын бұл формалды тіркестерге ашық қарсылығын білдірді:
«12 адам көз жұмып, бір әулет түгел қырылып жатқанда осындай шаралар президенттің тапсырмасынсыз-ақ атқарылуы керек емес пе? Президент айтпаса — тергеу де жоқ, көмек те жоқ, қозғалыс та жоқ дегені ме?» – деп жазады ол.
Журналисттің пікірінше, елдің қабырғасын қайыстырған мұндай қасіретте бірінші басшының көңіл айтуы — қалыпты дүние. Алайда жергілікті басшылардың оны жарнамалап, «президентке ұнайын» дегендей жандайшаптыққа салынуы — үлкен мәселе.
Диас Нұрақынның айтуынша, бұл жағдай тек бір үйдің қайғысы емес — тұтас өңірдегі қауіпсіздік деңгейінің жоқтығының дәлелі.
Өрт болған үйдің есігі мен терезесі түгелдей темір торға қапталған.
Бұл — жай сән немесе қожайынның ермегі емес.
Ауылда ұрлық көбейген соң, тұрғындар өз үйін түрме секілді бекітуге мәжбүр болған.
Ал өрт шыққан сәтте торланған терезе — екінші шығатын жолды түгел жауып тастайды. Қара түтіннің иісі тисе де, қашып шығуға мүмкіндік жоқ.
Журналист бұл жағдайға заңсыздық пен қылмысты болдырмауға міндетті органдардың салғырттығы себеп екенін айтады:
«Штраф жинаудан қолы босамайтын камералар ауылдарды неге бақыламайды? Полиция неге алдын алу жұмысын істемейді? Егер қауіпсіздік дұрыс жолға қойылса, ешкім өз үйін қамау камерасына айналдырмас еді», — дейді ол.
