БҚО-да 180 млн теңге жымқырған қаржы пирамидасын ұйымдастырушы сотталды

Батыс Қазақстан облысында 180 млн теңге жымқырған қаржы пирамидасын ұйымдастырушы сотталды, деп хабарлайды Todayinfo. Ақпаратқа сәйкес, 2022 жылдың қыркүйегінен 2023 жылдың сәуіріне дейін Шыңғырлау ауданының тұрғыны «Chia Tai Pharmaceutical» қаржы пирамидасына қосылып, оның құрылымдық бөлімшесінде жетекші орынға ие болған. Фармацевтикалық зауытқа заңды инвестиция саламыз деген желеумен ол фармацевтикалық кәсіпорын қызметінен жоғары кіріс алуға уәде беріп, салымшылардың қаражатын заңсыз тартқан. Оның қылмыстық әрекетінің салдарынан 185 жәбірленушіге жалпы көлемі 180 миллион теңгеден астам материалдық шығын келтірілген.

- Сот айыпталушын ҚРҚылмыстық кодексінің 217-баптың 2-бөлігі 2-тармағы («Қаржылық (инвестициялық) пирамиданы құру және басқару»), 218-баптың 2-бөлігі 3-тармағында («Қылмыстық жолмен алынған ақшаны және (немесе) өзге мүлікті заңдастыру (жылыстату)») көзделген қылмыстарды жасағаны үшін кінәлі деп тауып,қылмыстық құқықбұзушылықтың жиынтығымен 5 жыл мерзімге қаржы ұйымдарында басшы лауазымдарды атқару және қаржы ұйымының қатысушысы болу құқығынан айыра отырып, 5 жылға бас бостандығынан айыру түріндегі жаза тағайындады, – делінген прокуратура хабарламасында.

Келтірілген шығын жәбірленушілердің пайдасына толығымен өндірілді. Сот үкімі заңды күшіне енді.