"Дәлізде жатырмыз": Алматы облысы Қарасай ауруханасында жүрек ауруымен түскен науқастарға орын жетіспейді

Алматы облысындағы Қарасай аудандық орталық ауруханасында медициналық көмек алу жағдайы сын көтермейді. Куәгерлердің айтуынша, ауруханадағы орын тапшылығы салдарынан жүрек ауруларына шалдыққан науқастарды дәлізге жатқызуға мәжбүр болып отыр. Бұл жағдай, әсіресе, шұғыл және сапалы көмекті қажет ететін кардиологиялық пациенттер үшін аса қауіпті. Дәлізде ем қабылдау ең қарапайым санитарлық талаптарға сай келмейді және науқастардың сауығу процесін қиындатады.

Халықтан жиналған триллиондар қайда?

Ауруханадағы бұл көрініс «Әлеуметтік медициналық сақтандыру қоры» КЕАҚ-ның жұмысына қатысты үлкен сұрақтар тудырады. Аталған Қор жыл сайын халықтан міндетті жарна ретінде триллиондаған теңге жинайды. Халықтан жиналған орасан зор қаражатқа қарамастан, өңірлердегі ауруханалардың неліктен ең қажетті орынмен қамтамасыз етілмегені түсініксіз. Қарапайым азаматтар сапалы медициналық көмек үшін жарна төлегенімен, іс жүзінде аурухана дәліздерінде жатуға мәжбүр. Бұл жағдай денсаулық сақтау саласындағы қаржыландырудың тиімділігі мен ашықтығына, сондай-ақ МӘМС жүйесінің өзінің қажеттілігіне күмән келтіреді. Қазақстан Республикасының Денсаулық сақтау министрлігі мен тікелей министр Ақмарал Шәріпбайқызын Алматы облысы Қарасай ауруханасындағы осы келеңсіз жағдайды жедел бақылауға алып, науқастардың құқығын қорғауды және мәселенің түпкі себебін анықтауды сұраймыз.