Қазақ эстрадасының аңызына айналған "Дос-Мұқасан" ансамблінің белді мүшесі Мұрат Құсайыновтың атақсыз қалғаны желіні жарды. Әндері бірнеше буынның құлағында жатталған өнер иесінің әлі күнге дейін "Қазақстанның Халық әртісі" болмағаны көпшілікті таңғалдырды. Tengri Life тілшілері Мәдениет және ақпарат министрлігіне хабарласып, мәселенің мән-жайын анықтады.
Әлеуметтік желідегі дау Threads платформасында басталды. Оқырмандардың бірі жас әншілердің төсбелгі тағып жатқанын, ал жарты ғасыр сахнада жүрген Құсайыновтың назардан тыс қалғанын жазған. Бұл жазба миллионнан астам қаралым жинап, қызу талқыға түсті.
Көпшілік "Мұрат аға бұл атаққа 50 жыл бұрын лайық болған" деп қолдаса, енді бірі әртістің мінез-құлқын сынап, бұрынғы даулы оқиғаларды еске түсірді.
Министрлік не дейді?
Ресми ведомство Мұрат Құсайыновтың "Қазақстанның Халық әртісі" емес екенін растады. Алайда, бұл жерде "астыртын саясат" жоқ болып шықты. Мәселе құжаттамада екен.
Министрліктің мәліметінше, әртіске атақ беру туралы ешкім өтініш (ходатайство) түсірмеген.
"Мұрат Құсайыновқа атақ беру туралы министрлікке ұсыныс келіп түскен жоқ. Биылғы жылы мемлекеттік марапаттарға құжат қабылдау аяқталды. Егер келесі жылы тиісті құжаттар мен өтініш заңды түрде рәсімделіп келсе, министрлік оны қарауға дайын", — деп түсіндірді ведомство өкілдері.
Дегенмен, музыкант мемлекет тарапынан мүлде елеусіз қалған жоқ. Оның қоржынында бірнеше салмақты марапат бар:
-
"Қазақстанның еңбек сіңірген әртісі";
-
"Қазақстанның еңбек сіңірген қайраткері";
-
"Құрмет" ордені;
-
"Парасат" ордені.
Ескі даудың салқыны бар ма?
Желі қолданушыларының пікірі екіге жарылды. Бірі оны аңызға баласа, екіншісі 2019 жылы Астана әуежайында болған шулы оқиғаны ұмытпаған.
Естеріңізге сала кетейік, сол жылы "Air Astana" компаниясы музыканттың қызметкерге қол көтергенін мәлімдеген еді. Әртіс дөрекі сөйлегені үшін бортқа жіберілмеген. Құсайыновтың өзі бұл айыпты жоққа шығарып, аяқ киімін шешуді талап еткенде ашуланғанын ғана мойындаған болатын.
Сол кездегі сот шешімімен әншіге ұсақ бұзақылық үшін айыппұл салынып, билік өкілін қорғағаны үшін қылмыстық жауапкершіліктен босатылған еді. Кейбір тыңдармандар осы оқиға "Халық әртісі" атағын алуға кедергі болуы мүмкін деп топшылайды.
Қазіргі ереже бойынша, "Халық әртісі" атағын алу үшін үміткер бұған дейін "Еңбек сіңірген әртіс" немесе "Еңбек сіңірген қайраткер" атағына ие болуы шарт. Мұрат Құсайыновта бұл атақтар бар. Ендігі мәселе — ресми ұсыныстың түсуінде ғана.
