Дүниежүзілік банк Қазақстанға жыл сайын $1 млрд бөледі: ақша қайда жұмсалады?

Қазақстан мен Дүниежүзілік банк 2031 жылға дейінгі серіктестік бағдарламасын талқылады. Оның аясында банк елімізге алдағы алты жыл бойы жыл сайын 1 млрд долларға дейін қаражат бөлуге дайын екенін білдірді, деп хабарлайды Todayinfo ақпарат агенттігі. Бұл туралы Премьер-министрдің орынбасары – Ұлттық экономика министрі Серік Жұманғариннің Дүниежүзілік банк тобының өкілдерімен кездесуі барысында белгілі болды. Серік Жұманғарин екіжақты ынтымақтастықтың стратегиялық маңызын атап өтіп, 2031 жылға дейінгі өзара іс-қимыл бағыттарын айқындайтын құжатты дайындағаны үшін банк өкілдеріне ризашылығын білдірді.

"Дүниежүзілік банк алдағы алты жыл бойы жыл сайын 1 млрд долларға дейін қаржыландыруды қамтамасыз етуге дайын екені атап өтілді", - делінген ресми хабарламада.

Вице-премьердің айтуынша, бұл қомақты қаржы жеке секторды нығайтуға, инфрақұрылымды дамытуға және ел экономикасының бәсекеге қабілеттілігін арттыруға қосымша жағдай жасайды. Фото: Әлеуметтік желіден