Эминем мен Шакира Қазақстанда концерт береді: Күндері нақтыланып жатыр

Америкалық рэпер Эминем мен колумбиялық поп-жұлдыз Шакира Орталық Азия елдеріне арналған тур аясында Қазақстанда өнер көрсететінін растады, деп хабарлайды Todayinfo.kz ақпарат агенттігі. Ақпаратты Алматы Қоғамдық кеңесінің №5 комиссия отырысында “Спорттық нысандар дирекциясы” ЖШС-нің бас директоры Есет Байтасов мәлімдеді. Дирекцияның таныстырылымына сәйкес, екі концерт те 2026 жылы Алматының Орталық стадионында өткізіледі деп жоспарланып отыр. Есет Байтасовтың айтуынша, қазір бұл жай ғана келіссөз емес, нақты күндерді бекіту, ұйымдастырушылық және техникалық мәселелерді пысықтау кезеңі.

“Спорттық нысандар дирекциясының” мәліметінше, 2026 жылы Орталық стадионда 25 миллион теңгеге футбол алаңына, ал 37,7 миллион теңгеге қосалқы алаңның жеңіл атлетика жолақтарына жаңғырту жұмыстары жүргізіледі. Алайда дирекция бұл жұмыстар ірі концерттерге дейін бе, әлде кейін бе атқарылатынын, сондай-ақ көрерменнің көп жиналуы алаңның жаңа жабынына зиян келтіре ме, жоқ па – нақтыламады.