Нұрсұлтан Назарбаевтың жиені Нұрәлі Әлиев рухани жобаларға не себепті бет бұрғанын түсіндірді. Оның айтуынша, бұған жақын адамдарының қазасы себеп болған.
Нұрсұлтан Назарбаевтың жиені Нұрәлі Әлиев өзінің рухани жобаларға бет бұруының себебін ашты. Оның айтуынша, бұл шешімге жақын адамдарынан айырылуы түрткі болған, деп хабарлайды Todayinfo ақпарат агенттігі.
Кәсіпкер бұл туралы өзінің Instagram парақшасындағы «Сұрақ-жауап» айдарында бөлісті. Оқырмандарының бірі оның рухани әлемге деген қызығушылығы қалай басталғанын сұраған.
«Айтарым бір-ақ нәрсе: өміріңде жақын адамдарың дүниеден өткенде, біздің осы әлемде бар екенімізді түсіне бастайсың. Ал рухани әлем, тылсым дүние бізбен үнемі қатар жүреді. Шын мәнінде, біз бірге өмір сүреміз. „Жоқ, біз ол жаққа қарағымыз келмейді“ деп айтуға болмайды. Өкінішке қарай, көбі бұл туралы ойлауға да қорқады», — деді Әлиев.
Ол бұдан қорқудың қажеті жоқ екенін айтады.
«Мұнда тұрған ештеңе жоқ, екі әлем де қатар өмір сүреді», — деп сөзін түйіндеді кәсіпкер.
Бұған дейін Нұрәлі Әлиев өзін тәлімгер ретінде таныстырып, Spark of Light атты рухани жобасын іске қосқан болатын. Жобаның миссиясы — адамдарды толық трансформацияға, ішкі тыныштық пен үйлесімділікке бағыттау.
Сондай-ақ биыл Давоста өткен Дүниежүзілік экономикалық форумда Әлиев менталды денсаулыққа арналған шарада спикерлер қатарында болды.
Фото: Нұрәлі Әлиевтің Instagram парақшасынан
