Оралдағы перинаталдық орталықта лифтіде қаза тапқан әйелдің өліміне қатысты көптен күткен сот үкімі шықты. Төрт жылға созылған дауда қайғылы оқиғаға кінәлі деп айыпталған перзентхананың бұрынғы басшысы ақталды.
Бұл туралы Todayinfo порталы хабарлайды.
Іс материалдарына сай, марқұм 50 жаста болған және перинаталдық орталықта лифтші болып жұмыс істеген. Оқиға 31 желтоқсанда болған: ақауы бар жеделсаты есігіне денесі қысылып, әйел оқиға орнында көз жұмған.
Сотта лифттің 1981 жылдан бері қолданылып келе жатқаны, тозығы жеткені айтылды. Осы жайттан соң ескі қондырғыны тоқтатпағаны үшін мекеменің сол кездегі басшысына «лауазымдық міндетіне салғырт қарады» деген айып тағылған.
Сот: қылмыс құрамы жоқ
Алайда Орал қалалық соты экс-басшыны кінәсіз деп таныды. Судьяның мәлімдеуінше, оның әрекетінде қылмыс құрамы дәлелденбеген.
Сот шешімімен жәбірленуші тараптың 15 миллион теңге көлеміндегі өтемақы талабы да қанағаттандырылмады.
Қорғаныс не дейді?
Қорғаушы тарап тергеу барысында заң бұзушылықтар болғанын алға тартты. Айтуларынша, лифт басқа ұйымның теңгерімінде болған және оның техникалық жарамдылығын тұрақты тексеру мекеме директорының тікелей міндетіне кірмейді.
Сондай-ақ қорғаушы бұл істе «қылмыс субъектісі жоқ» деген уәжбен ақтау үкімі шыққанын атап өтті. Бұған қоса, лифтке жауапты деп танылуы мүмкін ұйымға қатысты мерзімнің өтуі секілді процессуалдық жайттар да жәбірленуші тараптың мүмкіндігін шектегені айтылды.
Оқиға Оралда төрт жыл бойы қоғам назарынан түспей, еңбек қауіпсіздігі, ескі инфрақұрылым және жауапкершіліктің нақты бөлінуі мәселесін қайта көтерген еді. Үкімге қатысты тараптардың алдағы қадамы (апелляция беру-бермеуі) әзірге жарияланған жоқ.
