Орамал таққан, тақия киген әртүрлі коучтар ұятқа жетелейтін контент жариялап жүр - имам (ВИДЕО)

Астана қаласының бас имамы Ерболат Жүсіпов әлеуметтік желілерде интим тақырыбына қатысты контенттің көбеюіне алаңдаушылық білдірді. Оның айтуынша, кейбір дін атынан сөйлейтін блогерлер мен коучтар ұятсыздыққа жетелейтін материалдар таратып жүр, деп хабарлайды Todayinfo.

«Мұсылман адам бір нәрсені жеткізген кезде дұрыс жолын таңдау керек. Өкінішке қарай, қазіргі уақытта орамал таққан, тақия киген әртүрлі коучтар ұятқа жетелейтін контент жариялап жүр. Экранның алдында отырып алып, әртүрлі сөздерді қолдану, іс-әрекетпен көрсету – арсыздыққа алып баратын қылықтар», – дейді Ерболат имам.

Соңғы жылдары әлеуметтік желілерде дін мен интим тақырыбын қатар талқылайтын блогерлер көбейіп, олардың контенті миллиондаған қаралым жинап жатыр. Желі қолданушыларының пікірі екіге бөлінген: бірі отбасылық қарым-қатынасты талқылаудың қажет екенін айтса, екіншілері мұндай тақырыптарды ашық жариялау арсыздық деп санайды.