Қазақстанда адамдарды рұқсатсыз фото-видеоға түсіруге тыйым салынуы мүмкін

Фото: pixabay Мәдениет министрі Аида Балаева елімізде адамдарды рұқсатсыз пранкке түсіруге тыйым салуды енгізу ұсынылып жатқанын мәлімдеді, деп хабарлайды Todayinfo.kz ақпарат агенттігі. Министр мәселе пранктер мен жасырын түсірілімдерге қатысты екенін түсіндірді. Айтуынша, азаматтар осыған жиі шағымданып жүр. Қазір арнайы жұмыс тобы құрылып, кімді, қашан және қандай жағдайда түсіруге болатынын анықтауы керек. Журналистер "мұндай дауларды соттар да шеше алады" дегенде, Балаева халықтан әлі де көп шағым түсіп жатқанын айтты.

“Көп адамға тыныш жерге бару, жәй ғана серуендеу де мүмкін болмай қалды. Өйткені оларды үнемі видеоға түсіреді", –  деді.

Журналистер бұл норманы шенеуніктерді қорғау үшін қабылдамақ деп сынады. Алайда Балаева шенеуніктердің жеке өмірі қалмағанын айтып, мәселе шенеуніктерде емес, жалпы тәртіпте екенін жеткізді.