Қазақстанда ІІ дағдысы жоқ азаматтар мемлекеттік қызметке қабылданбайды: жаңа талаптар

Қазақстанда мемлекеттік қызметке орналасу талаптары өзгермек: жасанды интеллекті (ІІ) қолдана алатын дағдысы жоқ үміткерлерді жұмысқа алмау жоспарда бар. Бұл туралы Цифрлық даму, инновациялар және аэроғарыш өнеркәсібі министрі Жаслан Мадиев айтты. Бұл туралы Todayinfo порталы хабарлайды. Министрдің сөзінше, қазірдің өзінде оқыту бағдарламасы 50 мың мемлекеттік қызметшіні қамтып отыр. Алдағы уақытта ІІ бойынша курстар олар үшін міндетті талапқа айналады. «Адам ІІ курстарынан өтпесе немесе тиісті дағдыға ие болмаса, жұмыс істей алмайды», — деді Мадиев.

Неге бұл талап қажет?

Ведомствоның түсіндіруінше, мақсат — мемлекеттік аппараттың кәсібилігін арттырып, қызмет көрсету сапасын күшейту. Яғни мемлекеттік қызметтің тиімділігі мен жылдамдығын ІІ құралдары арқылы көтеру көзделіп отыр. Қазақстанда соңғы жылдары eGov сервистері, деректерге негізделген шешім қабылдау, цифрлық құжат айналымы кең тарай бастады. Енді осы процестерді ІІ технологияларымен күшейту үшін кадрлардың өзі де жаңа деңгейге көшуі керек.

Мемқызметкерлерге нақты нені үйретеді?

Жаслан Мадиевтің айтуынша, бағдарлама тек «қолданушы деңгейімен» шектелмейді. Мемлекеттік қызметшілерге ІІ-агенттерді жасақтау, модельдерді баптау, мультиагентті платформалармен жұмыс істеу сияқты бағыттар да үйретіледі. Оған қоса, мұндай жұмысты жүргізу үшін есептеу қуаты, деректер жиынтығы, тілдік модельдер секілді ресурстар да берілмек. Министрдің пікірінше, тіпті бағдарламалау тәжірибесі жоқ адамдардың өзі үйреніп, ІІ-агент құрастыра алады — және дәл соған оқытып жатыр. Министрлік дерегінше, бүгінге дейін шамамен 3 мың мемлекеттік қызметші платформада жұмыс істеу және ІІ-агенттерді құру бойынша оқу курсынан өткен. Айта кетейік, бұған дейін өңірдегі тәжірибелер де талқыланған: Өзбекстанда ІІ енгізілуі нәтижесінде мыңдаған шенеунік қысқартылғаны туралы ақпарат тараған. Ең көп өзгеріс салық, су шаруашылығы және ауыл шаруашылығы салаларын қамтыған.